Неупиваемая Чаша - Икона Божией Матери
 
 
 







Неупиваемая Чаша - Икона Божией Матери PDF Печать E-mail
Молитвы и о молитвах - Молитвы и акафисты перед иконами Божией Матери
03.05.2012 00:27

Икона Божией Матери,

Икона Божией Матери,

именуемая «Неупиваемая Чаша»

 

4n

 

(5 / 18 мая)

 

    Эта икона, пребывающая в монастыре в г. Серпухове, прославилась многочисленными исцелениями от страсти пьянства.

    Бесценен и огромен опыт в борьбе с пьянством и в Православной Церкви. Сегодня, например, широко известна чудотворная икона Божьей Матери «Неупиваемая Чаша», возле которой проходят молебны во многих православных церквях, исцеляя души и тела огромного числа страдающих от алкогольной зависимости.

    Явление чудотворной иконы Божьей Матери «Неупиваемая Чаша» произошло в 1878 г. Крестьянин Ефремовского уезда Тульской губернии, отставной солдат, был одержим страстью пьянства. Пропивая всё, что имел, он вскоре обнищал. От пьянства у него отнялись ноги, но он продолжал пить.

    Однажды во сне ему явился старец и приказал идти в город Серпухов в монастырь Владычицы Богородицы, где находится икона Божьей Матери «Неупиваемая Чаша», и отслужить перед ней молебен.

    Без денег, не владея ногами, крестьянин не рискнул отправиться в путь. Но святой старец явился ему во второй, а потом и в третий раз и грозно приказал исполнить повеление.

    И тогда солдат отправился в монастырь на четвереньках.

    В одном селении он остановился отдохнуть. Чтобы облегчить боль, старушка-хозяйка растёрла ему ноги и уложила на печь. На следующий день ему стало легче. Опираясь сначала на две, а потом на одну палку, он дошёл до Серпухова.

    Придя в монастырь и рассказав о своих сновидениях, страждущий просил отслужить молебен. Но никто в монастыре не знал иконы Божьей Матери с таким наименованием. Тогда подумали: не та ли это икона, что висит в проходе из храма в ризницу? На оборотной стороне её действительно увидели надпись «Неупиваемая Чаша».

    Из Серпухова крестьянин возвращался домой здоровым. Весть о чудном прославлении иконы Божьей Матери быстро распространилась по России. Одержимые страстью пьянства, их родные и близкие спешили вознести молитвы к Богородице об исцелении от недуга, а многие приходили, чтобы возблагодарить Владычицу за Её великую милость.

    По иконографии эта икона относится к типу одного из древнейших изображений Божьей Матери — «Оранта», только Богомладенец написан стоящим в Чаше. Чаша с благословляющим Богомладенцем — это Чаша причащения, источающая приступающим к ней с верою все благословения, дарованные грешному роду человеческому искупительным подвигом Господа нашего Иисуса Христа. Эта Чаша действительно неупиваемая, или неиспиваемая, потому что Агнец её «всегда ядомый и никогда же иждиваемый». А Матерь Божья с воздетыми вверх пречистыми руками, как могучий первосвященник, ходатайственно возносит Богу эту Жертву — Своего закланного Сына, заимствовавшего плоть и кровь от Её пречистых кровей, — этот пренебесный Жертвенник за спасение всего мира — и предлагает в снедь верным. Она молится за всех грешников, для всех хочет спасения, вместо низких губительных пристрастий призывает к неистощимому источнику духовной радости и утешения. Она возвещает, что Неупиваемая Чаша небесной помощи и милосердия уготована каждому нуждающемуся.

 

 

 

 

АКАФИСТ

 

 

Кондак 1

 

Избранное и дивное избавление нам даровася - Твой образ честный, Владычице Богородице, яко избавлыиеся явлением его от недугов душевных и телесных и скорбных обстояний, благодарственная хваления приносим Ти, Всемилостивая Заступнице. Ты же, Владычице, "Неупиваемою Чашею" нами именуемая, приклонися благоутробно к нашим воздыханием и воплем сердечным, и избавление подаждь страждущим недугом пианства, да с верою воззовем Ти:

Радуйся,Владычице, Неупиваемая Чаша, духовную жажду нашу утоляющая.

 

 

Икос 1

 

Ангельстии чини и праведников сонми непрестанно славят Тя, Царицу Богородицу, Ходатаицу о многогрешнем роде христианстем, погрязшем в беззаконии и пребывающем во гресех, ибо во утешение и спасение даруеши ему милость Свою чрез многоименуемыя чудотворныя иконы Твоя, ихже яко звезды небесныя по всей земли нашей зрим; к единому же из сих образов, "Неупиваемая Чаша" именуемому, припадающе, из глубины сердца взываем Ти:

Радуйся, неприступнаго Божества селение

Радуйся, непрестанное людей удивление.

Радуйся, скорбьми грехи наша очищающая;

Радуйся, печальми наша немощи врачующая.

Радуйся, милость Свою чрез чудотворныя иконы Твоя нам свыше посылающая;

Радуйся, явлением их скорбная сердца наша возвеселяющая.

Радуйся, пречудное всех с Богом примирение;

Радуйся, геенны вечныя избавление.

Радуйся, Владычице, Неупиваемая Чаша, духовную жажду нашу утоляющая.

 

 

Кондак 2

 

Видящи, Пресвятая Владычице, скорби сердечныя, муки душевныя, искреннее покаяние людей, одержимых губительным пороком пианства, благоволила еси явити богоспасаемому граду Серпухову милость Свою явлением пречуднаго образа Своего "Неупиваемая Чаша", да вси к нему припадающе с верою и сокрушенным сердцем, получивше исцеление от тяжкаго недуга своего, из глубины души вопиют Богу: Аллилуиа.

 

 

Икос 2

 

Разумев трикратное явление преподобнаго Варлаама и повеление его в путь шествовати в богоспасаемый град Серпухов, человек некий, страстию пианства одержимый, обрете тамо в монастыре икону Твою святую, "Неупиваемая Чаша" именуемую. Мы же, видяще таковое о нас, грешных, попечение, с благоговением вопием Ти:

Радуйся, чрез благочестивых людей славу чудес Твоих грешным открывающая;

Радуйся, Путеводительнице прозорливая, путь спасения им показующая.

Радуйся, Всеблагая наша Наставнице, любовию Твоею нас привлекающая;

Радуйся, за вся благодеяния Твоя благодарению нас научающая.

Радуйся, скорбь нашу в радость претворяющая;

Радуйся, несомненною надеждою нас увеселяющая.

Радуйся, губительныя страсти наша разрушающая;

Радуйся, благим намерением способствующая.

Радуйся, Владычице, Неупиваемая Чаша, духовную жажду нашу утоляющая.

 

 

Кондак 3

 

Сила Вышняго и благодать Владычицы укрепляше некоего человека, страждущаго недугом пианства, егда он, нози разслаблене имуще, иде во град Серпухов, повеление Богоматере, чрез преподобнаго Варлаама реченное, исполняя. Пришед же во град сей, обрете икону Пречистыя Богоматере, абие исцеле от недуга своего, душевнаго и телеснаго, и из глубины души благодарственно воззва Богу: Аллилуиа.

 

 

Икос 3

 

Имуще источник неоскудеваемый, неупиваемую чашу небесных дарований, не токмо люди града Серпухова, но и вси православнии христианы иных градов и весей, притекающий к Твоему пречудному образу, "Неупиваемая Чаша" именуемому, и пред сим получивше исцеление, припадающе, благодарными усты вопиют Ти:

Радуйся, купеле, в нейже вся скорби наша погружаются;

Радуйся, чаше, еюже радость спасения нашего восприемлем.

Радуйся, наша немощи, душевныя и телесныя, врачующая;

Радуйся, страсти наша силою молитв Твоих укрощающая.

Радуйся, коемуждо, во всякой потребе просящим, полезная дарующая;

Радуйся, бесчисленныя щедроты всем подающая.

Радуйся, милости сокровище нам открывающая;

Радуйся, милосердие к падшим являющая.

Радуйся, Владычице, Неупиваемая Чаша, духовную жажду нашу утоляющая.

 

 

Кондак 4

 

Бурю внутрь имущии помышлений сумнительных, но с искренним покаянием притекающий к Твоему неизреченному милосердию, одержимии пианственною страстию, получают исцеление, и из глубины сердца вопиют рожденному от Тебе Спасителю нашему: Аллилуиа.

 

 

Икос 4

 

Слыша Господь тяжкия скорби, вопли и плач жен, стариц, детей, сродницы коих обуреваеми суть пианственною страстию, даде им, Владычице, Твою икону, от неяже вси притекающий обретают утешение и радость духовную, и вопиют Ти со слезами:

Радуйся, Агнице, рождшая Агнца, вземлющаго грехи мира;

Радуйся, чаше, черплющая нам радость от источника безсмертия.

Радуйся, скорбных матерей утешение;

Радуйся, безнадежных Надеждо.

Радуйся, притекающих к Тебе благодатное охранение;

Радуйся, скорбящих отрадо и увеселение.

Радуйся, волнение страсти пианства утишающая;

Радуйся, руку помощи Твоей требующим простирающая.

Радуйся, Владычице, Неупиваемая Чаша, духовную жажду нашу утоляющая.

 

 

Кондак 5

 

Яко боготечную звезду, честную икону Твою Ты нам показала еси, Владычице мира, юже мы зрище, с верою сердечною молящеся Тебе, Богородице, глаголем: исцели пианством и иною болезнию душевною и телесною страждущих, верных же научи воспевати хвалу Богу: Аллилуиа.

 

 

Икос 5

 

Видяще чудеса преславная и знамения пречудныя, бываемая не токмо от иконы Твоей, Богомати, во граде Серпухове явленныя, но и от по подобию сея иконы списанных изображений, припадающе к ним, смиренно вопием Ти:

Радуйся,скоропредстательная Помощнице усердно к Тебе притекающих;

Радуйся, благосердная Услышательнице молений наших.

Радуйся, град Серпухов благословением Твоим осенившая;

Радуйся, в пределех Московских славу чудес Твоих показавшая.

Радуйся, всем требующим сокровище исцелений неоскудное;

Радуйся, в трезвении благоподвизающихся всемощная Покровительнице.

Радуйся, ведущим брань противу мира, плоти, диавола и пианства добрая Споспешнице;

Радуйся, в мире благочестно живущих усердная Заступнице.

Радуйся, Владычице, Неупиваемая Чаша, духовную жажду нашу утоляющая.

 

 

Кондак 6

 

Проповедающе чудеса Твоя, Богородительнице, от иконы Твоея "Неупиваемая Чаша" именуемыя, бываемая, молим Тя, Пречистая, со слезами: избави всех нас от виннаго пристрастия и от падения греховнаго, научи нас воздержанию, подвизающи воспевати Богу: Аллилуиа.

 

 

Икос 6

 

Возсияла еси в светлости Божественныя славы, Дево Богоотроковице, на Младенца, Превечнаго Бога, Господа нашего Иисуса Христа, зрящи. Иже в сосуде, аки в неупиваемой чаше, предстоит, якоже Тя видим изображённую на иконе Твоей, "Неупиваемая Чаша" таинственно пронареченней, от неяже избавление от пианственныя страсти притекающим с верою даруеши, сего ради со слезами приносим Тебе гласы немолчныя сице:

Радуйся,яко о Тебе радуется и торжествует ангельский собор и человеческий род;

Радуйся,яко Твоя слава превосходит похвалы земныя и небесныя.

Радуйся,таинственным изображением Сына в сосуде Тайну Божественныя Евхаристии нам открывающая;

Радуйся, рожденнаго Тобою Агнца, всегда ядомаго и никогдаже иждиваемаго, нам дивно указующая.

Радуйся, чаше жизни и безсмертия, ко вратам вечныя жизни нас приводящая;

Радуйся, источником нетления и радости жаждущия души напояющая.

Радуйся, несчетною благостию не оставляющая самых презренных и отверженных;

Радуйся, от рова погибели милосердием Твоим исхищающая безнадежных.

Радуйся, Владычице, Неупиваемая Чаша, духовную жажду нашу утоляющая.

 

 

Кондак 7

 

Хотя человек некий возблагодарити Тя, Владычице, за исцеление от недуга пианства, украси Твою пречудную икону, Богомати, во граде Серпухове пребывающую, из глубины сердца воспевая Богу: Аллилуиа.

 

 

Икос 7

 

Новое чудо видим, Владычице, от иконы Твоея святыя: страждущий бо недугом пианства некий раб Божий Стефан, прибегая к Твоему матернему предстательству, от тяжкаго недуга своего избавися, и благодаряще Тя, благолепными дары икону Твою украси, и припадающе к ней, со слезами возопи Тебе тако:

Радуйся, Живоносный Источниче исцелений;

Радуйся, чаше небесная Божественных дарований.

Радуйся, реко исцелений приснотекущая;

Радуйся, море, вся наша страсти потопляющее.

Радуйся, под тяжестию греха пианства падающих матернима рукама Твоима возставляющая;

Радуйся, благодарственныя дары не отвергающая.

Радуйся, сердца благочестивых людей возвеселяющая;

Радуйся, вся благая прошения наша исполняющая.

Радуйся, Владычице, Неупиваемая Чаша, духовную жажду нашу утоляющая.

 

 

Кондак 8

 

Странно и сумнительно неверующим слышати, како икона Твоя святая "Неупиваемая Чаша" Божественных исцелений источает чудо. Мы же, верующие слову Твоему, Владычице, реченному к первописанней Твоей иконе: "Благодать Рождшагося от Мене и Моя с сею иконою да будет", - веруем, яко и сия икона Твоя благодать Твою источает. Темже благоговейно покланяющеся, лобызаем ю, вопиюще Богу: Аллилуиа.

 

 

Икос 8

 

Все упование людие, страждущии недугом пианства, на Тя, Владычице, возлагают, Приклонися к немощем и страстем нашим, кто бо нас, грешных, изведет от рова погибели и нищеты духовныя и телесныя, аще не Ты, Владычице; сего ради, приклонше колена пред Твоим пречистым образом, вопием Ти тако:

Радуйся, моления грешников не отвергающая;

Радуйся, призывающим Тя Свою небесную помощь ниспосылающая.

Радуйся, глубину милосердия Твоего грешным показующая;

Радуйся, отчаянных и безнадежных ободряющая.

Радуйся, одержимым страстию пианства руку помощи простирающая;

Радуйся, терпеливых страдальцев благодатными дары утешающая.

Радуйся, недуги наша, душевныя и телесныя, врачующая;

Радуйся, суетныя радости мира сего презирати нас научающая.

Радуйся, Владычице, Неупиваемая Чаша, духовную жажду нашу утоляющая.

 

 

Кондак 9

 

Всякое естество ангельское удивися делу Твоего милосердия, Господи, яко даровал еси грешному роду человеческому твердую Заступницу и Помощницу, к нашим немощем приклоняющуюся, и от горькаго недуга пианства свобождающую, верныя же научающую пети Богу: Аллилуиа. 

 

 

Икос 9

 

Ветии человечестии недоумеют восхвалити по достоянию славное, Владычице, иконы Твоея явление, ниже мы, грешнии, от скверных устен наших возможем принести достойное похваление Заступнице нашей. Обаче неисчетная чудеса, иконою Твоею являемая, видевше, душею и сердцем радующеся, Тебе глаголем:

Радуйся, от священнаго лика Твоего чудеса источающая;

Радуйся, от бед и скорбей скоро избавляющая.

Радуйся, отвергающих Тя посрамляющая;

Радуйся, от всякаго зла прибегающих к Тебе сохраняющая.

Радуйся, кротким сиянием Твоим мрак греха и мглу страстей наших разгоняющая;

Радуйся, души наша любовию к Тебе и Сыну Твоему исполняющая.

Радуйся, на стезю покаяния нас премудре наставляющая;

Радуйся, добраго ответа пред Судиею Праведным нам усердная Ходатаице.

Радуйся, Владычице, Неупиваемая Чаша, духовную жажду нашу утоляющая.

 

 

Кондак 10

 

Спасти хотя многия страждущия недугом пианства, чудную икону Твою, Богомати, даровала еси, да вси, одержимии сею страстию, к чудотворному образу Твоему притекают, и, получивше исцеление, во умилении взывают Богу: Аллилуиа.

 

 

Икос 10

 

Стена еси и щит, Богомати, людем, страждущим недугом пианства, и всем, усердно к Тебе притекающим, и икону Твою святую благоговейно чтущим. Ибо сию дарова нам благих Податель Господь в помощь и врачевство от губительныя страсти, и сим внушает нам пети Тебе:

Радуйся, отчаянных надеждо и печалей наших утоление;

Радуйся, болезней душевных и телесных исцеление.

Радуйся, нашу скверну чистотою Твоею очищающая;

Радуйся, Своею благодатию наше недостоинство просвещающая.

Радуйся, брение наше тленное в нетление облекающая;

Радуйся, моления наша Твоим предстательством подкрепляющая.

Радуйся, в неможении нашем нас утверждающая;

Радуйся, облегающий нас облак страстей скоро разгоняющая.

Радуйся, Владычице, Неупиваемая Чаша, духовную жажду нашу утоляющая.

 

 

Кондак 11

 

Пение наше смиренное, от полноты любви и усердия Тебе приносимое, не презри, Чистая, и не отврати от отчаявшихся и страждущих недугом пианства лика Своего, но помози им и нам очиститися от всякия скверны греховныя, да возможем достойно и праведно пети Богу: Аллилуиа.

 

 

Икос 11

 

Светоприемную свещу зрим Тя, Пресвятая Дево, ибо образ Твой святый лучами благодати Твоей мглу греховную прогоняет и на светлую стезю добродетелей наставляет с верою зовущих Ти таковая:

Радуйся, заступлением Твоим от суеты мира сего многомятежнаго нас избавляющая;

Радуйся, приражения страстей плотских отражати нам помогающая.

Радуйся, мысль благу в сердце наше полагающая;

Радуйся, нечистую совесть нашу просвещающая.

Радуйся, от мучительнаго недуга пианства страждущих избавляющая;

Радуйся, к искреннему покаянию и вразумлению призывающая.

Радуйся, души всех озлобленных умягчающая;

Радуйся, на помощь Тя призывающих и имя Твое славящих спасающая.

Радуйся, Владычице, Неупиваемая Чаша, духовную жажду нашу утоляющая.

 

 

Кондак 12

 

Благодать Божия, присущая иконе Твоей, "Неупиваемая Чаша" именуемой, влечёт к ней, Владычице, всех скорбящих, обездоленных, вдов и стариц, а наипаче же всех страждущих недугом пианства, и не тщетни отходят, Пречистая, от неупиваемыя чаши Твоих Божественных дарований, но неоскудно получая цельбы чудотворнаго образа Твоего, Всеблагая, благодарственно поют Богу: Аллилуиа.

 

 

Икос 12

 

Поюще Твоя чудеса и велию милость, людем, одержимым страстию пианства, явленныя, молим Тя, Владычице, спаси и помилуй, и настави нас на стезю праву, и не остави нас, покрова Твоего ищущих и зовущих Ти:

Радуйся, воздержанию от греха пианства всех подвизающая;

Радуйся, от пристрастия к вину росою милости Твоея свобождающая.

Радуйся, страждущих от тяжкаго греха пианства присное врачевание;

Радуйся, бедствующим в страстех скорая Помощнице.

Радуйся, малодушых дивное ободрение;

Радуйся, благодушных велия радосте.

Радуйся, Радуйся,гордых смиряющая;

Радуйся, смиренныя возвышающая и всем спасения желающая.

Радуйся, Владычице, Неупиваемая Чаша, духовную жажду нашу утоляющая.

 

 

Кондак 13

 

О Премилостивая Мати Сладчайшаго Господа нашего Иисуса Христа! Нынешнее наше услыши моление и избави нас от всех недугов, душевных и телесных, наипаче же свободи страждущих недугом пианства рабов Твоих (имена их), да не во зле погибнут, но да спасеннии Тобою, присно вопиют Богу: Аллилуиа.

 

(Этот кондак читается трижды, затем икос 1 и кондак 1)

 

 

 

МОЛИТВА ПЕРВАЯ

 

О Премилосердная Владычице! К Твоему заступлению ныне прибегаем, молений наших не презри, но милостиво услыши нас — жён, детей, матерей — и тяжким недухом пианства одержимых и того ради от Матере своея — Церкви Христовой и спасения отпадающих, братьев и сестёр и сродник наших исцели.

О, Милостивая Мати Божия, коснись сердец их и скоро возстави от падений греховных, ко спасительному воздержанию приведи их.

Умоли Сына Своего, Христа Бога нашего, да простит нам согрешения наша и не отвратит милости Своея от людей Своих, но да укрепит нас в трезвении и целомудрии.

Приими, Пресвятая Богородице, молитвы матерей, о чадах своих слёзы проливающих, жён, о мужех своих рыдающих, чад, сирых и убогих, заблудшими оставленных, и всех нас, к иконе Твоей припадающих. И да приидет сей вопль наш, молитвами Твоими, ко Престолу Всевышняго.

Покрый и соблюди нас от лукаваго ловления и всех козней вражиих, в страшный же час исхода нашего помоги пройти непреткновенно воздушныя мытарства, молитвами Твоими избави нас от вечного осуждения, да покрыет нас милость Божия в нескончаемыя веки веков. Аминь.

 

 

МОЛИТВА ВТОРАЯ

 

Царице наша Преблагая, Надеждо наша, Пресвятая Богородице, приятелеще сирых и странных Заступнице, бедствующих помоще и озлобленных покрове. Зрише нашу беду, зрише нашу скорбь: отвсюду искушениями одержимы есмы, а заступающего несть. Ты убо Сама помози нам, яко немощны, окорми, яко странны, настави нас, яко заблудших, уврачуй и спаси нас, яко безнадежных. Не имамы иныя помощи, ни инаго предстательства, ни утешения, токмо Тебе, о Мати всех скорбных и обремененных. Призри на нас, грешных и во озлоблении сущих, покрый нас Честным Твоим Омофором. Да избавлени будем от зол, обышедших нас, наипаче же пиянства. Да восхвалим всегда Пресвятое имя Твое. Аминь.

 

 

ТРОПАРЬ

 

Тропарь, глас 4

 

Днесь притецем вернии к Божественному и пречудному образу Пресвятыя Богоматери, напояющей верных сердца небесною неупиваемою чашею Своего милосердия и людям верным чудеса показующей. Яже мы видяще и слышаще духовно празднуем и тепле вопием: Владычице Премилостивая, исцели наша недуги и страсти, моляще Сына Твоего, Христа Бога нашего, спасти души наша.

 

Кондак, глас 6

 

Бысть чрево Твое святая Трапеза, имущая Небеснаго Хлеба, Христа Бога нашего, от Негоже всяк ядый не умирает, якоже рече всех, Богородительнице, Питатель.

 

Стихира по 50-м псалме, глас 6

 

Днесь Владычицы чудотворная икона прославляется, днесь вернии на молитву пред нею отовсюду собираются, днесь и маловернии помыслми покаяния озаряются, силы Небесныя о славе Пречистыя радуются, мы же, яко Ангелом научихомся, тако вопием: радуйся, Благодатная, Господь с Тобою, благословена Ты в женах, благословено Твое к нам милосердие, благословен Плод чрева Твоего, слава Тебе.

 

 

КАНОН

Пресвятой Богородице в честь ее иконы «Неупиваемая Чаша»

 

Канон, глас 4-й

 

Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Припев: Пресвятая Госпоже Богородице, услыши молитву раб Своих, молящихся Тебе.

Ангел вопияше Тебе, Дево Чистая: радуйся! Мы же что Ти принесем, благаго Царя благая Мати, яко явила еси нам в сия последняя времена сокровище неоскудное – чудотворную икону Твою на освящение и исцеление душ и телес наших.

Пресвятая Госпоже Богородице, услыши молитву раб Своих, молящихся Тебе.

Ты буди нам утверждение и в бедах скорое заступление, Царице Небесе и земли, на Тебе надеемся, непрестанно моляще Твою благостыню.

Пресвятая Госпоже Богородице, услыши молитву раб Своих, молящихся Тебе.

Богатство духовное неиждиваемое даровала еси рабом Твоим, Жизнь рождшая, пренепорочная Чистая Дево, икону Твою священную, еяже прославление светло празднующе, вернии, избавляемся от всяких бед и скорбных обстояний.

Пресвятая Госпоже Богородице, услыши молитву раб Своих, молящихся Тебе.

Святая Владычице, Пречистая Бога нашего Мати, всех Творца неизреченно рождшая, моли всегда благость Его страстей нас избавити и оставление грехов нам даровати.

Слава: Озари, всепетая Дево, чистшая светлостей солнечных, слепотствующий ум наш разумом истиннаго Боговедения, да не погибнем люте во гресех наших: помыслы благочестия сердца наша просвети, да, спасшеся Тобою, радостно возгласим: слава силе, слава и милосердию Твоему, Господи, Благодетелю всеблагий.

И ныне: Молим Тя, яже прежде век избранная в Матерь Господа, исцели расслабленныя грехом души наша, оживи росою покаяния сердечнаго и молитвы слезной, укрепи в сердцах рабов Твоих веру истинную и любовь нелицемерную, да сподобимся подвигом добрым подвизатися, веру непорочну соблюсти, житие мирно скончати, хваля Господа: слава долготерпению Твоему, Спасе наш.

 

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

 

Песнь 3

Ирмос: Твоя песнословцы, Богородице, живый и независтный источниче, лик себе совокупльшия, духовно утверди, в Божественней Твоей славе, венцев славы сподоби.

Пресвятая Госпоже Богородице, услыши молитву раб Своих, молящихся Тебе.

Достойно есть величати Тя, Богородицу, даровавшую пречистый образ Свой в помощь и Божественное заступление святей обители сей от враг видимых и невидимых.

Пресвятая Госпоже Богородице, услыши молитву раб Своих, молящихся Тебе.

Богоначальным мановением святая икона Твоя, Владычице, от лет древних хранимая, ныне, яко чаша, благодать Твою обильно изливающая, есть достояние обители Твоея, темже благочестно прославляюще Тя, Богородице, достойно величаем.

Пресвятая Госпоже Богородице, услыши молитву раб Своих, молящихся Тебе.

Не остави нас, Богородице, нечистыми страстьми влаятися, не остави в беззаконию наших погибнути, но молящихся Тебе житие свое исправите научи и Твое милосердие воспети достойно.

Пресвятая Госпоже Богородице, услыши молитву раб Своих, молящихся Тебе.

Человеков молитвы и Ангелов славословие, Владычице, приемлющи, и моего убогаго не отврати моления, скорбь души моея утоляющи, паче же терпение в скорбех присно мне подающи.

Слава: Владычице Пречистая, елика просим днесь от Тебе прияти, сия от чудотворныя Твоея иконы нам подаждь, и немощное наше произволение утверди, и небесных благ желание в сердца наша всели.

И ныне: Нашему спасению буди, Богородице, ходатаица и наставница, но и телесныя нужды и болезни наша исцели; зане маловерни и нетерпеливи суще, помыслы уныния в бедах наших вдаемся и наипаче терпения дар у Бога просити требуем.

 

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

 

Господи, помилуй (трижды).

Седален

Яко воистинну Божественное украшение Церкви и залог милости Твоея к христоименитым людем икона Твоя, Богородице Дево, показася: всяк бо, с верою к ней приходяй, в недузех исцеление, в скорбех утешение, в бедах вспоможение от Тебе скоро приемлет, всемилостива бо сущи, милости Твоея источник в чудотворнем образе Твоем нам зде являеши, да славим имя Твое преблагословенное во веки.

Слава, и ныне: Исполнение закона и пророков рождшая, Христа Бога, исполни радости и веселия всех, чтущих святую икону Твою, Владычице, да, светло днесь празднующе, Тя радостно воспоем и любовию имя Твое прославим, яко Ты еси едина от всех родов избранная, благословенная и препрославленная.

 

Песнь 4

Ирмос: Седяй в славе на Престоле Божества во облаце легце, прииде Иисус Пребожественный нетленною дланию и спасе зовущия: слава, Христе, силе Твоей.

Пресвятая Госпоже Богородице, услыши молитву раб Своих, молящихся Тебе.

Иже в бедах сущии человецы, ведите, яко близ вас избавление верное обретается, аще токмо с верою сие призывати будете, сице глаголюще: о, Владычице, помози и прости нас грешных, о нас милосердовавши.

Пресвятая Госпоже Богородице, услыши молитву раб Своих, молящихся Тебе.

Вемы, Владычице, вемы, яко веры исполненная молитва Тобою не отщетится; но сицевыя веры лености ради нашея не стяжахом, аще и стяжати возжелехом. Темже и вопием: веруем, Пречистая, помози нашему маловерию.

Пресвятая Госпоже Богородице, услыши молитву раб Своих, молящихся Тебе.

Широкий путь жития зле возлюбихом, Богородице, к погибели сыны своя влекущий и веру их сокрушающий; но пред святою Твоею иконою предстояще, покаяние о сем приносим и помощи Твоея смиренно просим, во еже на путь спасения обратитися.

Пресвятая Госпоже Богородице, услыши молитву раб Своих, молящихся Тебе.

Еже ко временному житию потребное вмале полезно есть, но паче сих о сухости сердец наших восплачем, о братие, и исцеления страстей наших просити потщимся, греховное житие свое окаявше и горних даров тепле возжелевше.

Слава: Ядом страстей извращена ми душа, и нозе мои по пути спасения ходити не возмогут, аще не Твоим, Пречистая, предстательством благодатную обрящу помощь, во еже на путь правый устремити души моея шествие.

И ныне: Церковь, в нейже икона Твоя пребывает, Богородице, врачебница недугов телесных и душевных является, веры же учительница и неверия явная обличительница.

 

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

 

Песнь 5

Ирмос: Ужасошася всяческая о Божественней славе Твоей: Ты бо, неискусобрачная Дево, имела еси во утробе над всеми Бога и родила еси безлетнаго Сына, всем воспевающим Тя мир подавающая.

Пресвятая Госпоже Богородице, услыши молитву раб Своих, молящихся Тебе.

Людей мольбы и славословия, пред чудотворным Твоим образом и на всяком месте возносимыя, благоутробно, Владычице, приими, и, узами Твоея любве души наша пророчески связавши, сия в Небесное привлецы Царство, и тамо Твоему лицу поклонится сподоби.

Пресвятая Госпоже Богородице, услыши молитву раб Своих, молящихся Тебе.

Благочестно отвсюду, о Богомати, к чудотворней иконе Твоей притекающим и усердно покланяющияся милостей Твоих и щедрот не лишаеши, от бед сия спасаеши, от недуг избавляеши, духи лукавыя от них прогоняеши, утешение же и здравие всем подающи, яко всеблагая.

Пресвятая Госпоже Богородице, услыши молитву раб Своих, молящихся Тебе.

К Твоей, Дево, прибегаем благости, и очи сердец наших к Тебе, Чистая, возводим: не презри воздыханий наших молитвенных, но буди нам покров и помощница в день судный.

Пресвятая Госпоже Богородице, услыши молитву раб Своих, молящихся Тебе.

Освящение, здравие и спасение душам и телесем нашим, Мати Божия, от святыя Твоея иконы подаеши, ейже благочестно покланяемся и усты и сердцем благоговейно сию целуем, Твоя чудеса и неисчетную милость к христианскому роду присно славяще.

Слава: Известная верных еси помощница и всяких благ подательница, Пречистая Дево, иконою бо Твоею чудотворною неисчетныя милости просящим подаеши и вся спасаеши, иже Тебе верно вопиют от души: помилуй и спаси нас, Владычице.

И ныне: Мати Божия всеблагая, милосердых щедрот Твоих не лиши нас, обнищавших во гресех, и от челюстей мысленнаго волка исхити души наша, да не погибнем до конца, но приносим присно плоды покаяния Богу.

 

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

 

Песнь 6

Ирмос: Божественное сие и всечестное совершающе празднество, богомудрии, Богоматере, приидите, руками восплещим, от Нея рождшагося Бога славим.

Пресвятая Госпоже Богородице, услыши молитву раб Своих, молящихся Тебе.

О, преславных чудес Твоих, Владычице, и многаго Твоего к человеком сострадания: единым бо прикосновением к иконе Твоей немощныя врачуеши, и издалече, в сониих и видениих, к ней требующих Твоего заступления призывавши.

Пресвятая Госпоже Богородице, услыши молитву раб Своих, молящихся Тебе.

Вода освященная и елей от лампады иконы Твоея святыя недуги неисцельныя, Богородице Дево, врачуют и оныя с верою приемлющим во исцеление и спасение бывают; сего ради Тя, Целительницу, ублажаем, и чудеса Твоя, от иконы Твоея явленная и присноявляемая, славим.

Пресвятая Госпоже Богородице, услыши молитву раб Своих, молящихся Тебе.

Расторгни пленицы наших грехопадений, избави от рова страстнаго жития, и даруй свободу рабом Твоим, Богородице, да скончаем прочее живота нашего в мире и покаянии, уповающе наследити вечную славу.

Пресвятая Госпоже Богородице, услыши молитву раб Своих, молящихся Тебе.

Зряще на Твою, Богородительнице, икону, молим Тя, яко Матерь Света незаходимаго, отжени от нас мрак страстей Того светлостию, да, просвещшеся, воспоем: слава силе Твоей, Господи.

Слава: Ты тихое обуреваемым, Богородице, пристанище, Ты радость печалию погруженным, болящим Ты исцеление и покров всем, к Тебе прибегающим, Владычице, едина Чистая и Благословенная.

И ныне: Тя, Богоневесто Чистая, недостойнии раби, славим, лобызающе бренными устны образ Твой святый, и Тебе молимся со слезами: спаси нас от лютых грехопадений, да избавимся от вечныя муки.

 

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

 

Господи, помилуй (трижды). Слава, и ныне.

 

Кондак, глас 6-й

Бысть чрево Твое святая Трапеза, имущая Небеснаго Хлеба, Христа Бога нашего, от Негоже всяк ядый не умирает, якоже рече всех, Богородительнице, Питатель.

 

Икос

Како отверзу бренная уста и воспою Небо одушевленное, Деву Марию, от Неяже нам возсия Солнце мысленное, Христос, просвещаяй всякаго человека? Недоумеет бо ум мой, безгласием язык связуется. Но к чудес виновней Тоя иконе зряще, ангельски воспоем, глаголюще:

Радуйся, неистощимое сокровище благодати;

Радуйся, чудес неизследимая пучино.

Радуйся, всем верным Божественное услаждение;

Радуйся, скорбящим всерадостное веселие.

Радуйся, обидимым скорое избавление;

Радуйся, в житейстем мори спасительное окормление.

Радуйся, обуреваемым страстьми тихое пристанище;

Радуйся, оружие, во брани мысленней противныя поражающее.

Радуйся, молние, попаляющая диавола;

Радуйся, врачевство, болезни вся исцеляющее.

Радуйся, миро благовонное всему миру;

Радуйся, горо, вся осененная Божеством.

Радуйся, Дево, всех благих виновная верным;

Радуйся, Невесто Неневестная.

 

Песнь 7

Ирмос: Не послужиша твари Богомудрии паче Создавшаго, но огненное прещение мужески поправше, радовахуся поюще: препетый отцев Господь и Бог, благословен еси.

Пресвятая Госпоже Богородице, услыши молитву раб Своих, молящихся Тебе.

Неисповедимое чудес море вемы Тя, Богородице, паче бо ума и слова оными Ты прославилася еси. Тем ныне, яко Матерь Божию, в песнех Тя славим, раби Твои, благодарственно.

Пресвятая Госпоже Богородице, услыши молитву раб Своих, молящихся Тебе.

Живоносный источниче, Богородице Дево, зноем страстей палимую мою душу напои благодатными струями Сына Твоего, и услади горесть сердца моего зрением святаго образа Твоего.

Пресвятая Госпоже Богородице, услыши молитву раб Своих, молящихся Тебе.

Непостыдную предстательницу нам дарова, икону Матери Своея, иже Ея зряще, веселимся и умильно зовем: помози, Владычице, всем, и от всех злых спаси, и Царствию Небесному сподоби.

Пресвятая Госпоже Богородице, услыши молитву раб Своих, молящихся Тебе.

Тобою вси спасаемся и от нахождений диавольских свобождаемся. Тя Бог показа нам заступницу и Твою честную икону нам дарова, Ейже вопием: Владычице, помози, и от всех злых человек спаси, и Царствию Небесному сподоби.

Слава: Не умолчим, Владычице, чудеса Твоя, яко Своею честною иконою всех спасаеши и страждущих от бед избавляеши, недужным цельбы подаеши, и нас от всех злых спаси, и Царствию Небесному сподоби.

И ныне: Пение от недостойных раб приими, Мати Христа Бога, и не отрини мене от Своего пречистаго лица, но спаси от злых всех, и Царствию Небесному сподоби.

 

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

 

 

Песнь 8

Ирмос: Отроки благочестивыя в пещи Рождество Богородичо спасло есть, тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Пресвятая Госпоже Богородице, услыши молитву раб Своих, молящихся Тебе.

Приидите, вси вернии, воспоем Пречистую Деву Марию и честному Ея образу поклонимся, вопиюще от сердца: радуйся, Гавриилово благовещение; радуйся, Царя Христа восприимши и на руку Своею держа, яко солнце. Того моли, Чистая, от злых спасти душу мою.

Пресвятая Госпоже Богородице, услыши молитву раб Своих, молящихся Тебе.

Божественныя Твоея иконы святое явление, яко солнце, возсия в сердцах, луча всечестная просвещает светом Своим всех, вопиющих Ей: радуйся, благая наша предстательнице и скорая помощнице, славословящих Тя, Пречистая, помилуй нас.

Пресвятая Госпоже Богородице, услыши молитву раб Своих, молящихся Тебе.

Правоверно чтущих Тя, Царицу всех Бога, и Твоей чудней иконе святей любезно покланяемся, вопиюще: о, Божия Мати, спаси от клеветы злых человек и избави мя, славословящаго Тя, и помилуй.

Пресвятая Госпоже Богородице, услыши молитву раб Своих, молящихся Тебе.

Божественней Твоей иконе покланяемся, Богородице Дево, просяще от Тебе великия милости, юже даруй рабом Своим, едина Чистая, и от всякия злобы избави, и славословящих Тя, Пречистую, помилуй.

Слава: Взираю на Божественный образ Твой, и чту Владычню Божию Матерь, и взираю на подобия пречистаго Ея лица зрак, покланяюся и вопию: Дево Богородице, чтущих Тя, Многопетую, во веки сохрани.

И ныне: Приими песнь исходную, Мати живаго Бога, и спаси всех, верно покланяющихся святому Твоему образу и чудотворней иконе и вопиющих Тебе, Богородительнице: молися, Пречистая, Сыну Своему, помиловатися от всех злых.

 

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

 

Песнь 9

Ирмос: Всяк земнородный да взыграется, Духом просвещаемь, да торжествует же безплотных умов естество, почитающее священное торжество Богоматере, и да вопиет: радуйся, всеблаженная Богородице, Чистая Приснодево.

Пресвятая Госпоже Богородице, услыши молитву раб Своих, молящихся Тебе.

Богородице пречистая, аще и многогрешни суть людие, в Твой святый храм притекающии, но якоже Сын Твой спасения ради грешник от небес к нам пришел есть, тако и Ты от небесных кругов на моления наша призри и прошений людей Твоих не презри, Всепетая.

Пресвятая Госпоже Богородице, услыши молитву раб Своих, молящихся Тебе.

Да утверждается Православная вера умножением исцелений, от Твоея чудотворныя иконы, о Владычице, бываемых, да прославляется в людех Твое предстательство, паче же над страстьми победою увенчай наша зде возносимыя Тебе молитвы.

Пресвятая Госпоже Богородице, услыши молитву раб Своих, молящихся Тебе.

Твоей чудотворней иконе, Пречистая, покланяяся и сию благоговейно лобызая, о своих же грехопадениих ужасаяся, сице реку: аще подобает мне их ради скорби приимати, терпения дар молитвою Твоею мне низпосли.

Пресвятая Госпоже Богородице, услыши молитву раб Своих, молящихся Тебе.

Отечество наше, Владычице, паче всех стран земли чудотворными иконами Твоими просветила еси, яже, аки звезды небесныя, нощь земнаго жития нашего освещают и по пути правому ходити нас научают.

Слава: Множеству людей, семо притекающему, многая дарования от чудотворныя иконы Божия Матере подаются, от нихже лучшее есть, еже в чувство покаяния приити и на деяния благая устремитися. В сем убо помощь Твою яви мне, Пречистая.

И ныне: Помощи Богородицы Пречистыя, о братие, мнози свидетелие зде обретаются, нашему же нерадению обличителие, темже чудотворней иконе Владычицы предстояще, к покаянию теплому устремим душ наших шествие.

 

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

 

Тропарь, глас 4-й

Днесь притецем, вернии, к Божественному и пречудному образу Пресвятыя Богоматере, напояющей верных сердца небесною неупиваемою чашею Своего милосердия и людем верным чудеса показующей. Яже мы видяще и слышаще духовно празднуем и тепле вопием: Владычице премилостивая, исцели наша недуги и страсти, молящи Сына Твоего Христа Бога нашего спасти души наша.

 

Кондак, глас 6-й

Слава, и ныне: Бысть чрево Твое святая Трапеза, имущая Небеснаго Хлеба, Христа Бога нашего, от Негоже всяк ядый не умирает, якоже рече всех, Богородительнице, Питатель.

 

Обновлено 15.05.2012 22:24
 






Рейтинг@Mail.ru Рейтинг@Mail.ru Rambler's Top100 Яндекс.Метрика