Знамение (Курская – Коренная) икона Божией Матери
 
 
 







Знамение (Курская – Коренная) икона Божией Матери PDF Печать E-mail
Молитвы и о молитвах - Молитвы и акафисты перед иконами Божией Матери
27.03.2012 21:23

Зна̀мение (Ку̀рская – Коренна̀я)

Зна̀мение (Ку̀рская – Коренна̀я)

икона Божией Матери

 

Курская-Коренная

 

8 / 21 марта, 8 / 21 сентября,

27 / ноября / 10 декабря,

В 9-ю пятницу по Пасхе

 

 

икона Божией Матери «Знамение» (Знамение Коренно-Курская), самая почитаемая икона в Русской Зарубежной Церкви получившая наименование Одигитрия русского рассеяния.

 

Память 8 марта в день чудесного спасения иконы от посягания революционеров-безбожников, 10 июня, 8 сентября в день обретения, 27 ноября в день празднования иконы "Знамение", в 9-ю пятницу по Пасхе.

 

Курская икона Знамение Божией Матери - одна из древнейших икон Русской Церкви обретенная в XIII веке, во время татарского нашествия, когда все Русское государство испытывало величайшее бедствие, а город Курск, разоренный полчищами Батыя, пришел в запустение. 8 сентября 1295 года, в день Рождества Пресвятой Богородицы, небольшая дружина охотников из Рыльска прибыла на охоту к реке Тускоре, в 27 верстах от Курска. Один из этих охотников, муж благочестивый и благоговейный, высматривая добычу в лесу, нашел небольшую икону, лежавшую лицом вниз на корне дерева. Едва он поднял икону, чтобы рассмотреть ее, как из того места, где лежала св. икона, забил сильный многоводный источник чистой воды. Икона оказалась «Знамения» Божией Матери. Охотник, нашедший икону, понял, что это не простая икона. Он созвал своих спутников, и они общими усилиями сейчас же срубили небольшую часовенку, в которой и поставили обретенную икону. Жители Рыльска, узнав о новоявленной иконе, стали посещать ее для поклонения, и от иконы стали источаться многочисленные чудотворения.

 

Рыльский князь Василий Шемяка, узнав об иконе, приказал перенести ее в Рыльск, что и было сделано с большим торжеством: весь город вышел навстречу чудотворной иконе, приближавшейся с крестным ходом. Только сам Василий Шемяка уклонился от участия в этом торжестве – и ослеп. После усердного покаяния и молитв перед иконою, он опять прозрел. В благодарность за это он соорудил в Рыльске храм Рождества Пресвятой Богородицы, где и была поставлена икона, и с тех пор, в день явления её 8 сентября установлено ежегодное празднование.

 

Но недолго пробыла икона в Рыльске. Трижды она чудесно исчезала из Рыльска, и ее находили в том месте, где она явилась впервые охотнику. После этого рыльчане поняли, что Божия Матерь благоволит, чтобы икона оставалась на месте явления, и соорудили новую часовню и оставили ее там навсегда.

 

В 1385 году Курская область была снова опустошена татарами. Они хотели сжечь часовню и икону, но деревянная часовня не загоралась. Живший при часовне священник, о. Боголеп, объяснил им, что причина этого чуда - в иконе. Тогда разъяренные татары разрубили икону пополам и разбросали половинки в разные стороны, а часовню сожгли. Священника они взяли в плен, и он в Крыму пас татарские стада. Спустя некоторое время он был выкуплен послами Московского князя, приходившими в Орду, и возвратился к месту, где была часовня. После долгих поисков с постом и молитвою, он нашел обе половинки святой иконы, сложил их вместе, и они срослись так, что не осталось никакого следа от разреза, и только на его месте выступило нечто, «аки роса».

 

Город Курск был восстановлен в 1597 году, при царе Феодоре Иоанновиче, и тогда же, по его повелению, икона была доставлена в Москву, где благочестивый царь много молился перед ней и вставил ее в раму с изображением Господа Саваофа вверху и пророков, пророчествовавших о Божией Матери, по сторонам. Царица Ирина Феодоровна украсила икону богатой ризой, после чего икона вернулась обратно в свою часовню. В том же году, с помощью царя, на месте часовни был воздвигнут храм Рождества Пресвятой Богородицы и основан монастырь, а над источником на месте явления Иконы выстроена была другая церковь во имя Живоносного Источника. Новый монастырь стал называться Коренной пустынью, в память явления иконы при корне дерева.

 

В 1598 году, при нашествии крымских татар на юг России, св. икона была для большей безопасности перенесена в Курск, а в пустыне был оставлен точный список с нее. В 1603 году Лжедмитрий I взял ее из Курска в свой лагерь в Путивль, а затем в Москву, где она находилась в царских хоромах до 1615 года, когда она вернулась, по повелению царя Михаила Феодоровича, в Курск и была поставлена в Курском соборном храме, а в 1618 году - в соборе Знаменского монастыря. С тех пор большую часть года икона проводила в Курске, а в Коренную пустынь она переносилась лишь на время. С 1806 года, по Высочайшему повелению, было определено, что икона должна находиться в Коренной пустыни с пятницы 9-й седмицы по Пасхе и до 12 сентября. В эти дни св. икона переносилась из Курска в Коренную пустынь и обратно торжественным крестным ходом, который растягивался на весь путь от Знаменского монастыря в Курске до Коренной пустыни - 27 верст. Этот порядок соблюдался до 1919 года, когда икона отбыла за границу.

 

Икона и её списки сопровождали русское воинство во многих походах. В 1676 году икона путешествовала на Дон для благословения Донских казачьих полков. В 1684 году Государи Иоанн и Петр Алексеевичи прислали в Коренную пустынь список со иконы с повелением, чтобы этот список сопровождал в походах православных воинов. В 1687 году икона посылалась в «большой полк». В 1689 году списки с иконы были даны полкам в Крымский поход. В 1812 году список с иконы был послан к князю Кутузову в действующую армию.

 

Также перед этой иконой молился и ещё ребенком получил свое первое исцеление преподобный Серафим Саровский.

 

В ночь с 7 на 8 марта 1898 года злоумышленники революционеры-безбожники решили взорвать чудотворную икону, но, несмотря на страшные разрушения в соборе вокруг иконы, сама икона осталась невредима.

 

12 апреля 1918 года икона была украдена из собора Курского Знаменского монастыря, ограблена, но 2 мая опять была найдена и опять вернулась на свое место. Наконец, в 1919 году, в сопровождении епископа Курского и Обоянского Феофана и нескольких из братии Знаменского монастыря, икона ушла за границу, через Константинополь, в братскую Сербию. В 1920 году она вновь, по просьбе генерала Врангеля, посетила землю Русскую в Крыму и оставалась там до общей эвакуации Русской Армии ген. Врангеля в первых числах ноября 1920 года. Икона возвратилась в Сербию, где и пребывала до 1944 года, когда, вместе с Архиерейским Синодом Русской Зарубежной Церкви, выехала за границу, находилась в Мюнхене (Бавария), при митрополите Анастасии. В 1950 году митрополит Анастасий из Мюнхена переехал в Америку. С того же года под Нью-Йорком была создана Ново-Коренная пустынь для принятия чтимого образа, который прибыл в США 5 февраля 1951 года в сопровождении архимандрита Аверкия (Таушева). Встреченная епископом Серафимом в аэропорту, святая икона была немедленно доставлена на монастырской машине в Ново-Коренную пустынь. С 1957 года икона пребывает в посвященном ей главном соборе Архиерейского Синода в Нью-Йорке.

 

 

АКАФИСТ

 

Кондак 1


Взбранной Воеводе и благой Одигитрии, путеводящей нас к Небесному Граду, приидите, припадем вси, града зде пребывающего не имущии, Тоя всесильнаго заступления просяще, чудеса же, от лет древних даже доныне от иконы Ея бываемыя, поминающе, велегласно возопиим:

Радуйся, Владычице, знамения милости Твоея миру присно являющая.



Икос 1

 
Ангели удивишася, зряще Тя, Владычице, иконою Твоею, яко столпом огненным, нам предходящую в великом исходе нашем из земли, беззаконники порабощенныя. Не Моисея бо, но Самую Тя имамы Путеводительницу в скорбном странствовании нашем, темже Ти благодарне зовем:

Радуйся, благословенная Одигитрие;

Радуйся, истиннаго Пути Мати.

Радуйся, сквозь пустыню мира сего нас провождающая;

Радуйся, Амалика мысленнаго преславно побеждающая.

Радуйся, источники благодати от иконы Твоея источающая;

Радуйся, закон Сына Твоего, Христа Бога нашего, на скрижалех сердец наших написующая.

Радуйся, зноем страстей палимых благодатное окропление;

Радуйся, изнемогающих всемощное укрепление.

Радуйся, сердец смятенных тишайшая усладо;

Радуйся, странных и сирых Божественная отрадо.

Радуйся, землю обетованную нам приуготовляющая;

Радуйся, небеснаго Иерусалима врата нам отверзающая.

Радуйся, Владычице, знамения милости Твоея миру присно являющая.

 


Кондак 2


  Видехом, видехом выну чудеса и знамения Твоя, Владычице, исповедуем милость, не таим благодеяний Твоих, обаче велегласно вопием: Аллилуиа.

 


Икос 2

 
Разум Божий кто постиже и тайну судеб Его кто повесть? Возводит бо и низводит, смиряет и возносит, поражает и исцеляет, и кто бысть советник Ему? Темже и нас, грех наших ради, смири и царство наше низложи, сыны наша по всему лицу земли разсеяв. К кому убо прибегнем в скорби нашей, к кому руце прострем, аще не к Тебе, Всеблагая. Обаче сердцем сокрушенным вопием Ти таковая:

Радуйся, Сына Твоего за нас умоляющая;

Радуйся, праведный гнев Божий утоляющая.

Радуйся, беззаконий наших очищение;

Радуйся, грешным Ходатаице прощения.

Радуйся, светильник упования немеркнущий нам возжегшая;

Радуйся, во исходе и странствовании нашем иконою Твоею нам предтекшая.

Радуйся, вся разсеянныя воедино собирающая;

Радуйся, омофором Твоим светообразным вся покрывающая.

Радуйся, раздоры и нестроения умиряющая;

Радуйся, советы нечестивых разоряющая.

Радуйся, плавающих в житейском море окормляющая;

Радуйся, попечением Твоим ни единаго же оставляющая.

Радуйся, Владычице, знамения милости Твоея миру присно являющая.

 


Кондак 3


Силы Тобою деются и благодать от честныя иконы Твоея неоскудно изливается, Преблагословенная Дево, вся подвизая о Тебе вопити: Аллилуиа.

 


Икос 3

 
Имущи милосердие неизреченное, тамо благодать Твою возсияваеши, Всеблагая, идеже тьма огустевает и скорби приумножаются, темже не оставила еси нас сирых, обаче во иконе Твоей к нам убогим пришла еси, славящим Твое снисхождение и вопиющим сице:

Радуйся, чудес море;

Радуйся, милости пучино.

Радуйся, благодати приснотекущий источниче;

Радуйся, исцелений кладезю неисчерпаемый.

Радуйся, естества уставы победшая;

Радуйся, законы естественныя пременившая.

Радуйся, скорби наша на радость прелагающая;

Радуйся, плач и стенание в веселие духовное претворяющая.

Радуйся, озлобления и беды на пользу нам обращающая;

Радуйся, враги наша преславно смиряющая.

Радуйся, чаяния врагов посрамляющая;

Радуйся, поющия Тя возвеселяющая.

Радуйся, Владычице, знамения милости Твоея миру присно являющая.

 


Кондак 4

 
Бури искушений, на нас находящей, скорбям же и болезням, нас посещающим, егда терпению в нас оскудевати и духу нашему смущатися, притецем ко образу Пречистыя Девы и слезы точаще Той, от сердца возопиим: Богоноснеи руце Твои нам простирающи, из глубины зол возведи ны, яко да благодарными усты зовем: Аллилуиа.



Икос 4


Слышаху древле людие российстии слух явления святаго Твоего образа в дубраве Курстей и текше к нему со тщанием, умильно взываху: “Откуду нам сие, да прииде к нам Мати Господа нашего”, узрев же икону Твою, Владычице, при корене древеснем лежащую, и приемше ю, яко сокровище великое, возопиша Тебе, Первообразней:

Радуйся, раю светлейший, древо Жизни израстивший;

Радуйся, вертограде Божественный, древо Церкви прозябший.

Радуйся, Цвете благовонный, мир весь облагоухаяй;

Радуйся, крине непорочный, вселенную украшаяй.

Радуйся, лозо благоплодная, вином умиления всех напоившая;

Радуйся, розго освященная, плоды сладостными род человеческий напитавшая.

Радуйся, кореню домостроительства Божия;

Радуйся, спасения нашего верх и главизно.

Радуйся, злыя наши страсти из корене посекающая;

Радуйся, добродетелей сад насаждающая.

Радуйся, добрые обычаи в нас вкореняющая;

Радуйся, причастники райския жизни быти нас сподобляющая.

Радуйся, Владычице, знамения милости Твоея миру присно являющая.

 


Кондак 5


Боготочней звезде подобящеся, икона Твоя честная, Госпоже, землю Русскую и грады ея обтекаше, царие сей благоговейно поклоняхуся, царицы любовию ту благоукрашаху, архиереи страхом сретаху, верных же множества, духовно торжествующе, вопияху: Аллилуиа.



Икос 5


Видяще безбожников безумный совет икону Твою, Пречистая, разорити, от Тебе, Дево, посрамленный, и обретше образ Твой святый, от всякаго действа сокрушительна невредим, монаси и мирстии страхом и любовию возопиша Ти сицевая:

Радуйся, крепосте несокрушимая;

Радуйся, стено нерушимая.

Радуйся, лютых безбожников совет посрамившая;

Радуйся, чаяния врагов осуетившая.

Радуйся, хулителей уста заградившая;

Радуйся, икону Твою святую невредимо сохраншая.

Радуйся, от руки злодейской сия соблюдшая;

Радуйся, очи Твои от скверных дел человеческих обращающая.

Радуйся, лица Твоего Пречистаго от нас, убогих, не отвращающая;

Радуйся, из руки диаволи грешныя исхищающая.

Радуйся, прощение кающимся возсиявающая;

Радуйся, двери милосердия Божия ходатайством Твоим отверзающая.

Радуйся, Владычице, знамения милости Твоея миру присно являющая.

 


Кондак 6

 
Проповедует мир весь милости, от иконы Твоея изливаемыя, Всецарице! Отнелиже бо изшла еси тою из земли Русския, несть град, ниже весь, в них же не бе являема сила Твоя. Тем же от всех язык спасении и Тобою вопиют благодарно Богу: Аллилуиа.




Икос 6

 
Возсияй нам паки свет упования, Богородице Пречистая, зарю спасения миру возвестившая во Твоем рождестве. Не предаждь нас до конца в руце врагов наших и советы нечестивых и лютых отступников скоро разори. Да будет и страна наша Российская, якоже древле дом Твой, да процветет в ней благочестие, святыя обители и храмы да бла-гоукрасятся, людие же, от лютых безбожников избавльшеся, да торжествуют с веселием, славяще Твое заступление и зовуще Ти таковая:

Радуйся, любовию Твоею всему миру возсиявшая;

Радуйся, из уст Божественных Сына Твоего всыновление рода человеческаго приявшая.

Радуйся, Мати Божия и Мати христианом;

Радуйся, недугов отъятие и Целительнице раном.

Радуйся, в темницах сущих незаходимый Свете;

Радуйся, узников отрадо и пространство клетей.

Радуйся, за правду гонимых дерзновение;

Радуйся, за веру страждущих тернение.

Радуйся, мучеников венчание;

Радуйся, мучителей грозное воздаяние.

Радуйся, связнем узы разрешающая;

Радуйся, телом и душою плененных свобождающая.

Радуйся, Владычице, знамения милости Твоея миру присно являющая.



Кондак 7

 
Хотящу праведному Судии и Богу человеки, Того забывающия, вразумити, попусти бранем велиим на земли воздвигнутися. Языцы бо смятошася и царства поколебашася. Смерть и ужас по лицу земли пройдоша, плач и стенание воздух огласи. Тогда убо вси, иже на Тя упование возложиша, Богородице, ко образу Твоему усердно притекаху и, от Тебе единыя спасения чающе, Богу, давшему Тя людем Заступницу, вопияху: Аллилуиа.

 


Икос 7

 
Новые знамения и чудеса велия явила еси от иконы Твоея честныя, Богомати, егда услышахом глас брани. Градом бо горящим и земли трясущейся, чертогом разрушаемым и пругом воздух исполняющим, соблюла еси церковь, в ней же образ Твой, Всецарице, пребываше, не-вредиму: вси же в ней молящиися, чудо видяще, едиными усты возопиша Ти таковая:

Радуйся, Державная Воеводо;

Радуйся, на Нюже уповают вси народи.

Радуйся, Церкве Столп и Утверждение;

Радуйся, всякия святыни защито и ограждение.

Радуйся, победо, мир побеждающая;

Радуйся, и не имущия упования спасающая.

Радуйся, благая Послушательнице молений прилежных;

Радуйся, безпомощных помо-ще и надеждо ненадежных.

Радуйся, сатану под нозе наша сокрушающая;

Радуйся, огню и стихиям повелевающая.

Радуйся, иконою Твоею нас остеняющая;

Радуйся, Покровом Твоим нас осеняющая.

Радуйся, Владычице, знамения милости Твоея миру присно являющая.

 


Кондак 8


Странное и страшное знамение явила еси, Всесвятая, егда домом разрушаемым, храмину малую, юже освятила еси прежде иконы Твоея пребыванием, сохранила еси невредиму, старицу же и сына ея, в той крыющихся, целых представила еси. Тем же вси, зрящии и слышащии сия, ужасахуся ужасом, страхом вопиюще: Аллилуиа.

 


Икос 8

 
Весь мир любовию Твоею Богоподобною объемлеши, Приснодево, ближняя и дальняя посещающи и всю поднебесную во иконе Твоей приснопоклоняемей обтекающи. Тем же от восток даже до запад шествие Твое бысть, да вси невозбранно к той припадают, Тебе же Первообразней припевают сицевая:

Радуйся, всех радостей Радосте;

Радуйся, Чаше неупиваемая сладости.

Радуйся, нынешняго века скорбнаго утешение;

Радуйся, будущия жизни наслаждение.

Радуйся, веселящихся на небеси нас ради оставляющая;

Радуйся, к земли многоскорбней и многобедствующей приникающая.

Радуйся, со иконою Твоею благодатными стопы невидимо в домы наша входящая;

Радуйся, благословение и радование тем приносящая.

Радуйся, келлии монашеския образом Твоим честным освящающая;

Радуйся, клети убогия паче палат царских тем украшающая.

Радуйся, храмы Божии Ликом Твоим Пресвятым облистающая;

Радуйся, в жилищах чтущих Тя незримо пребывающая.

Радуйся, Владычице, знамения милости Твоея миру присно являющая.

 


Кондак 9

 
Всяк возраст и всяк чин притекает к Тебе, Богоневесто Владычице, всем бо простерты суть Богоноснеи Твои руце, всем вся подаеши независтно, вся светлиши и утешаеши, Всецарице. Темже, о Тебе веселящеся, вопием Богу: Аллилуиа.

 


Икос 9

 
Вития многовещанныя увядоша и ритори благоглаголивии изнемогоша, по долгу Тя прославити хотящии, Марие Богородице, недоумеет бо всяк ум благохвалити Тя по достоянию, обаче аще мы умолкнем — камение возопиют. Темже, аще и недостойнии суще, бренными усты дерзаем взывати Ти таковая:

Радуйся, пророков огнедохновенный глагол;

Радуйся, апостолов проповедь неумолкаемая.

Радуйся, преподобных сердечное пение;

Радуйся, исповедников крепосте и дерзновение.

Радуйся, молчальников тайнолепная беседо;

Радуйся, риторов и Богопроповедников Златыя уста.

Радуйся, на страсти подвизающихся превознесенная наградо;

Радуйся, всех праведников Божественная отрадо.

Радуйся, матерей славо и девства похвало;

Радуйся, старцев покой и юных Водительнице.

Радуйся, Адама смертнаго дщи, Богу же Родительнице;

Радуйся, славою неизреченною близ Бога сияющая.

Радуйся, Владычице, знамения милости Твоея миру присно являющая.

 


Кондак 10

 
Спастися миру тепле помолися, Богородице, помощи бо Твоея требует, сетям лукаваго, по всему лицу земли распростертым, языком же шатающимся, и бурям напастей, на Церковь Божию воздвизаемым; тем же, яко же в Кане Галилейстей иногда, рцы слово к Сыну Твоему и Богу, да воду искушений же и скорбей в вино умиления и веселия Божественнаго претворит, да поем Ему выну: Аллилуиа.

 


Икос 10

 
Стена необорима нам буди, Всенепорочная, сопротив ополчений видимых и невидимых враг, державно по нас поборающи, любовию вопиющих Ти таковая:

Радуйся, Богоноснеи руце Твои о нас к Богу присно воздвизающая;

Радуйся, духов злобы под нозе наша покоряющая.

Радуйся, князя тьмы хитросплетенные советы посрамляющая;

Радуйся, тучи помыслов Духом Божиим развевающая.

Радуйся, уныние от нас отгоняющая;

Радуйся, треволнения житейския смиряющая.

Радуйся, бурем напастей повелевающая;

Радуйся, обуреваемым благодатно окормляющая.

Радуйся, из глубины зол из-влачающая;

Радуйся, погибающим длани милостивно простирающая.

Радуйся, нози наша на пути спасения наставляющая;

Радуйся, руце наша во бранех укрепляющая.

Радуйся, Владычице, знамения милости Твоея миру присно являющая.

 


Кондак 11


Пения наша, якоже Сын Твой вдовичу лепту, приими, Всесвятая, и подаждь нам всегда Тебе сия приносити, живот наш в мире управляющи и грехом прощение дарующи, яко да в небесныя обители вшедше, воскликнем Богу: Аллилуиа.

 


Икос 11


Светообразный омофор Твой, Всеблагая, над землею нашею невидимо простри, нечестия безлунную ночь прогоняющи, зарю же пакибытия возсиявающи, да в радости немолчно зовем:

Радуйся, воистину в Солнце облеченная;

Радуйся, венцем от звезд увязенная.

Радуйся, рясны златыми преиспещренная;

Радуйся, красото неизреченная.

Радуйся, Светлосте, денницы светлейшая;

Радуйся, теплото, солнца любезнейшая.

Радуйся, зарнице будущаго века;

Радуйся, Свете невечерний ангелов и человеков.

Радуйся, темныя демонския полки далече отгоняющая;

Радуйся, неверия тьму просвещающая.

Радуйся, во оружия света нас облекающая;

Радуйся, Святыне, цветы всех добродетелей благоухающая.

Радуйся, Владычице, знамения милости Твоея миру присно являющая.



Кондак 12



Благодать возблагодать от иконы Твоея прияхом, Богородице Пречистая. Никтоже бо притекаяй к той с верою тощь отходит, но кийждо по потребе своей дар Божественный приемлет и радостию венчается, вопия к Богу: Аллилуиа.



Икос 12



Поем Тя, величаем Тя, поклоняем Ти ся, Госпоже Пречистая, сытости похвал Твоих отнюдь не знающе, и припадающи пред честным Твоим образом, умильно взываем Ти сице:

Радуйся, душ наших сладчайшая весно;

Радуйся, сердец наших светлейшее утро.

Радуйся, высото недомышляемая;

Радуйся, славо неувядаемая.

Радуйся, блаженство нескончаемое;

Радуйся, благосте неизсякаемая.

Радуйся, веселие неизреченное;

Радуйся, воистину едина Преблагословенная.

Радуйся, превыше всей твари Превознесенная;

Радуйся, в житии сем нас заступающая.

Радуйся, в час смертный верныя сретающая;

Радуйся, яко и на Страшном Судищи спасаеши на Тя уповающия.

Радуйся, Владычице, знамения милости Твоея миру присно являющая.



Кондак 13



О, Всепетая Мати и Мати всем Христианом, Сына Твоего и Бога любовию подражающи, вопиеши к нам милостивно: не бойся, малое стадо, Аз есмь с нами и никтоже на вы! Темже Ти любовию припадающе и со слезами благодаряще, велегласно зовем: Аллилуиа.


(Этот кондак читается трижды, затем икос 1 и кондак 1)

 

 

ВТОРОЙ АКАФИСТ

 

Кондак 1

 

Избранная и теплая мира Заступнице и всея земли Российския и Церкви Православныя, Курского края отрадо и утешение. Яко озареннии знамением Твоея благодати, под сень святыя Твоея иконы притекаем. Ты же, яко источник неиссякаемый, помогай нам во юдоли бед и скорбей, да благодарственно вопием Ти:

Радуйся, Пречистая, знамением вечныя радости мир утешающая.

 

 

Икос 1

 

Ангели и человецы удивишася, како по Вознесении Христове врагов Его к вере обратила еси, Владычице, егда бо они воспросиша от Тебе знамения, воздела еси руце с молитвой, и внезапу на персех Твоих возсия младенец Христос. Сему знамению чудящеся, и мы вопием Ти:

Радуйся, древле неверных знамением Твоим ко Христу обратившая:

Радуйся, и ныне сомнящихся чудесы просвещающая.

Радуйся, иконою Знамения возвеселившая Курский край:

Радуйся, тою сохраняющая его от лютых бед.

Радуйся, утешившая верных в агарянском пленении:

Радуйся, и нас ободряющая в демонских кознех.

Радуйся, иконами Твоими всю Россию осенившая:

Радуйся, теми яко звездами ко спасению нас путеводящая.

Радуйся, милостию милостивно от них народ в правой вере сохраняющая:

Радуйся, яко Тобою за Православие спасает Бог землю Русскую.

Радуйся, святое сердце, возлюбившее всех и вся:

Радуйся, чаше, в нейже слезы мира в сладкое вино радования претворяются.

Радуйся, Пречистая, знамением вечныя радости мир утешающая.

 

 

Кондак 2

 

Видяще Русь, яко Рахиль, плачущую о чадех свих, погибающих под игом агарянским, благословила еси, Владычице, во утешение разоренныя области Курския явити чудотворную икону Твою, юже в лесу при корени древа обрет простец некий и с любовию облобыза и узрев источник воды, зде истекший, радостно Богу возопи: Аллилуиа.


 

Икос 2

 

Разумеша вернии новое знамение милости Твоея благодатныя, егда разсеченную мечем агарянским икону Твою паки обрете пришед из плена иерей Боголюб в куще цветов. Егда же он с молитвой на устах соедини части ея, и сотворися икона цела, вси с удивлением сего ради возопиша:

Радуйся, необоримая стено православия:

Радуйся, столпе вселенския церкви.

Радуйся, иерея Боголюба сподобившая послужити иконе Твоей:

Радуйся, вдохнувшая ему мученическое дерзновение.

Радуйся, яко он с любовию претерпе плен за святыню Твою:

Радуйся, пред очию его разсечену икону сотворившая целу.

Радуйся, древних исповедников славо:

Радуйся новых мучеников веселие.

Радуйся, и нас научающая страдати за веру Христову:

Радуйся, сладосте за Христа погибающих.

Радуйся, светоносный облак, возносяй до врат небесных.

Радуйся, Пречистая, знамением вечныя радости мир утешающая.

 

 

Кондак 3

 

Силою Вышняго от града Рыльска возвращала еси, Богомати, чудную икону Твою в дебрь лесную, на место явления тоя. Царь же Феодор обитель тамо созда, да приходящии от многих стран людие со исцелением телесным и души своя покаянием уврачуют, зовуще непрестанно Богу: Аллилуиа.


 

Икос 3


Яко имущая державу непобедимую, чудесно спасла еси, Богомати, от сожжения агарянскаго пустынную обитель Твою и во гладе ее снабдеваше потребным. Иногда же и небеснаго благоухания всю исполняше. Сего ради в теплоте сердечной вопием Ти:

Радуйся, в леснем уединении обитель Твою охраняющая:

Радуйся, земную красоту пустыни небесной славой возвеличившая.

Радуйся, спасающихся зде озарившая даром прозрения:

Радуйся мудростию их спасающая богомольцев.

Радуйся, ревностным являющаяся в видении:

Радуйся ленивых устрашающая в сониех.

Радуйся, яко Тобою хромая еще на пути исцеле:

Радуйся, яко Тобою слепая крест обители Твоея издалече узре.

Радуйся, расслабленную воздвигшая водою источника:

Радуйся бесов изгнание и безумных здравие.

Радуйся, собирающая зде люди в тысячах многих,

Радуйся, всем обильную благодать подающая.

Радуйся, Пречистая, знамением вечныя радости мир утешающая.

 

 

Кондак 4

 

Бурею неверия одержим к чудотворней иконе Твоей, Всеблагая, слепотою наказуется князь Василий Шемяка, но в покаяние пришед паки восприемлет зрение телесное вкупе и душевное, со страхом поя: Аллилуиа.


 

Икос 4

 

Видевше граждане курские в нощи по стенам града ходящу дивную жену с шестию святоносными мужи, разумеша, яко Царица Небесная прииде спасти их от бед и от погибели, и восприимше нечаянную радостную победу на враги возопиша:

Радуйся взбранная Воеводо:

Радуйся, известная Заступнице.

Радуйся, слезныя молитвы приемлющая:

Радуйся, с небес на помощь нам ускоряющая.

Радуйся, море изобильных милостей Божиих:

Радуйся, источниче благоденствия земли Курския.

Радуйся, при гладе в земли Российстей благоплодие ей подавшая:

Радуйся, хлебом ея иныя страны напитавшая.

Радуйся, обнесением иконы Твоея спасавшая нивы от саранчи:

Радуйся, умножающая благорастворение дождей.

Радуйся, от смертоносные язвы избавление:

Радуйся, и жизни вечныя наслаждение.

Радуйся, Пречистая, знамением вечныя радости мир утешающая.

 

 

Кондак 5

 

Боготечныя иконы Знамения слышав чудеса, царь Феодор со славою приемлет ю в первопрестольный град, и окрест тоя образа пророков написати повелевает и ризою многоценною украшает.

Радуйся купно с ним и вся Москва, поюще: Аллилуиа.

 


Икос 5

 

Узреша нового избранника Божия граждане Курские, егда от иконы Знамения во отрочестве исцелен бысть преподобный Серафим и Тобою, Владычице, просвещаем яко солнце возблиста святостию и чудесы всему православному миру с любовию поющу Ти:

Радуйся, всех радостей радосте:

Радуйся, Таиннице душевнаго умиления.

Радуйся, светлосте молитвенных созерцаний:

Радуйся сокровище смиренномудрых.

Радуйся, преподобного Серафима тихая крепосте:

Радуйся, святителя Иоасафа пламенная ревносте.

Радуйся, новых светильников нам являющая:

Радуйся, им подражати нас научающая.

Радуйся, пресветлая славо святых,

Радуйся, крепосте немощных.

Радуйся, яко Тобою скорбь утоляется:

Радуйся, яко Тобою заря вечности сияет.

Радуйся, Пречистая, знамением вечныя радости мир утешающая.

 

 

Кондак 6

 

Проповедник силы Твоея бысть слепец некий, иже с верою припав к иконе Твоей и умыв очи от явленнаго источника Твоего, внезапу прозре и, видев красоту мира Божия и селения славы Твоея, радостию и веселием прославляше, поя сему: Аллилуиа.


 

Икос 6

 

Возсияла еси лествицею к небеси некой вдовице, яже блуднаго ради своего жития восхоте удавитися. Узревше же на облацех икону Твою Знамения, уразуме Божие долготерпение и милость, и от смертнаго уныния к чистому покаянию востече. Мы же яко Споручнице грешных вопием:

Радуйся, грешницу обратившая к покаянию:

Радуйся: очистившая ю подвигом странствования.

Радуйся, от отчаяния приводящая к мирной кончине:

Радуйся, освящение душ и телес.

Радуйся, бури козней бесовских смиряющая:

Радуйся, светлый облаче милостями Божиими нас покрывающая.

Радуйся, яко прогнанием лукавых прилогов вражиих нас от погибели избавляющая:

Радуйся, преодоление порочных желаний.

Радуйся, отсекающая пристрастие к земным утешениям:

Радуйся, устрояющая жизнь во Христе.

Радуйся, сущим во тьме порока изливающая свет спасения:

Радуйся, по тернистому пути в рай руководящая.

Радуйся, Пречистая, знамением вечныя радости мир утешающая.

 

 

Кондак 7

 

Хотящи спасти град Курск от разрушения, возвестила еси нощию нерукотворным таинственным звоном о грядущих вразех. Тако и ныне, Владычице, гласом чудес Твоих возбуди нас от сна греховнаго, да исправлением жития спасаемся от вечныя смерти, поюще: Аллилуиа.


 

Икос 7

 

Новые знамения и чудеса видяще, дерзайте убо, людие Божии: се бо велию благодать подает Царица Небесная от чудотворныя иконы Своея, да вся благая пред нею просимая исполняются. Вера наша спасет нас, и утешит Владычица, внегда к Ней припадаем, зовуще:

Радуйся, посреде нас ныне сущая:

Радуйся, тайны сердец наших ведущая.

Радуйся, гладным трапезо сладкопитанная:

Радуйся, в нуждах предстательство скорое.

Радуйся, наставников благодатная мудросте:

Радуйся, учащихся добрая помощнице.

Радуйся, утешение старости:

Радуйся, крепости изнемогающих.

Радуйся, унылых ободрение:

Радуйся, гонимых прибежище.

Радуйся, из тучи бед светлою надеждою облистающая:

Радуйся, вся к жизни полезная дарующая.

Радуйся, Пречистая, знамением вечныя радости мир утешающая.

 

 

Кондак 8

 

Страшно бе видети, егда бо Земля Курская изнемогаше от холерныя смерти, людие с воплем припадаше к Тебе, Всемилостивая, и со слезами покаяния обнесоша образ Твой с молебным пением окрест града, и преста губительство смертное. И плач горький изменися в радостную песнь спасающему Тобою нас Богу: Аллилуиа.


 

Икос 8

 

Всехвальную и святую чудотворную икону Твою, Приснодево, все жители области Курския с неизреченною радостию и благоговением всегда приемлют в домы своя, тепле вопиюще: и откуду нам сие, да прииде Матерь Господа нашего к нам, и припадают со слезами, сице моляшеся:

Радуйся, радость и благодать в домы приносящая,

Радуйся, любовию и согласием семьи осеняющая.

Радуйся, благодатное веяние святыни нам являющая:

Радуйся, благоуханием мирныя тишины духовныя нас озаряющая.

Радуйся, спасающая в тяжких скорбех матерей и чад:

Радуйся, вечная славо чистых дев и многострадальных матерей.

Радуйся, всесильное дерзновение родительской молитвы:

Радуйся, чад маловерных к Богу обращение.

Радуйся вдовиц духовное радование:

Радуйся, небесный жребий сиротствующих.

Радуйся, земного благоденствия изобилие:

Радуйся, наипаче страданьми небесное счастие устрояющая.

Радуйся, Пречистая, знамением вечныя радости мир утешающая.

 

 

Кондак 9

 

Всяку печаль утоляеши, Дево Пречистая. Сего ради ближнии и дальнии перенесение иконы Твоея светло празднующе, изобильно, яко весенния воды, на поклонение оной текут, и приемлюще дарование, о Тебе славят Бога песнию: Аллилуиа.

 


Икос 9

 

Вития милостей Твоих явися архимандрит Израиль, егда убо напоен быв от послушника ядом, притече с верою к чудотворней иконе Твоей и вкушением святаго елея спасение от смерти и здравие обрете, нас же научи звати к Тебе:

Радуйся, Владычице жизни и смерти:

Радуйся, страданьми влекущая к пламенней молитве.

Радуйся, чрез оковы врагов милость Божию являющая:

Радуйся, прощению обид научающая.

Радуйся, послушника оного обратившая к покаянию:

Радуйся, умягчение жестоких сердец.

Радуйся, зло претворяющая во благо:

Радуйся, яко Тобою познаем любовь Божию.

Радуйся, недоведомое враждующих примирение:

Радуйся, Мати великодушия, Ейже вся возможна.

Радуйся, от врат смертных к здравию возвращение:

Радуйся, продолжающая жизнь к покаянию.

Радуйся, Пречистая, знамением вечныя радости мир утешающая.

 

 

Кондак 10

 

Спасения нашего враг диавол многажды научаше людей, неверием омраченных, погубити святый образ Твой, но посрамлен бысть. Мы же, зряще неверие и вся ереси, яко прах возметаемы от руки Господни, православно поем: Аллилуиа.


 

Икос 10

 

Стены храма восколебашеся, смятеся весь град от страшного взрыва, уготованнаго ко истреблению иконы Твоей, Владычице. Обаче чудная святыня сия цела пребысть посреде разрушения крайняго, исполняя радостию мир православный, егоже не оставляет и доныне еже взывати к Тебе:

Радуйся, чудом истину православия возвестившая:

Радуйся, посрамляющая неверных делами рук их.

Радуйся, не допустившая взрыва в храме при богослужении:

Радуйся, спасшая множество верных от жестокия смерти.

Радуйся, начинания злая разрушающая:

Радуйся, вся к славе Божией обращающая.

Радуйся, стыдом покрывающая иконоборцев:

Радуйся, возвеличившая почитание святых икон.

Радуйся, кощунников изступлением ума наказующая:

Радуйся, исправляющая отступников и еретиков.

Радуйся, дождь огненный испущающая на еретические плетения:

Радуйся, живоносное росо на пажитях православия.

Радуйся, Пречистая, знамением вечныя радости мир утешающая.

 

 

Кондак 11

 

Воспевают Тя, Дево всепетая, сонмы Святых, иже в житии с терпением покрову Твоему достигоша. Буди убо и нам на земли благая Путеводительница, да Тобою обрящем небесную славу, поюще с лики Небесными: Аллилуиа.

 


Икос 11

 

Коль возлюбленна селения Твоя, Пречистая, коль вожделен храм Твой святый, идеже яко солнце сияет пречудная икона Твоя, пред неюже пастыри и святители благодарственное приносят пение. Еяже ради верни сладкогласно славят Господа Вышняго. Сердце моё возрадовася о Тебе, Всенепорочная; сего ради песнию вопию Ти:

Радуйся, царствующая во славе иконы Твоея:

Радуйся, Царице любве и щедрот.

Радуйся, медоносный цвете радования:

Радуйся, вино духовного торжества.

Радуйся, присноюнное умиление старости:

Радуйся, чистое радование младости.

Радуйся, пучино тишайшаго безстрастия:

Радуйся, сподобляющая дара спасительных слез.

Радуйся, радосте праведных о Господе:

Радуйся, забвение всех горестей.

Радуйся, святейшая Невесто, мир обручившая Богу:

Радуйся, эдемская розо, от еяже благоухания сердца яко воск истаевают.

Радуйся, Пречистая, знамением вечныя радости мир утешающая.

 

 

Кондак 12

 

Благодати Твоея неведуще, отметаются поклонения иконе Твоей заблудшие людие: не разумеют бо яко Матерь еси Всемогущаго, но хулением и неверием паки распинают Сына Твоего. Ты же златою мрежею любви Твоея улови и тех в послушание истины, да верою првою поют: Аллилуиа.


 

Икос 12

 

Поюще глубину Твоего милосердия, веруем, яко молитва Твоя восхищает от ада преисподняго, яко слезы Твоя отверзают двери райския нам многогрешным. Темже, любвеобильная Мати, поминай всех живых и умерших, горе и долу вопиющих Ти:

Радуйся, юже поют ангели и святи на небеси:

Радуйся, еюже спасаются грешнии на земли.

Радуйся, сущим во аде мук ослабу подающая:

Радуйся, яко Тобою вся тварь свободу славы чад Божиих чает.

Радуйся, возблиставшая нам нетление в Святых Тайнах Сына Твоего:

Радуйся, знамением вечныя радости смерть озарившая.

Радуйся, в час кончины утешение и отрадо:

Радуйся, в день суда всерадостное помилование.

Радуйся, победная песнь искупленных.

Радуйся, Еюже Бог будет всяческая и во всех.

Радуйся, Мати света, мира спасение.

Радуйся, Пречистая, знамением вечныя радости мир утешающая.

 

 

 

Кондак 13

 

О, Всеблаженная Мати, подаждь радость и покой всем величающим Тя и моли Сына Твоего, да помилует мир: заблудшиия спасет, умершия простит, нас же во Царствии Своем помянет о Тебе вопиющих Ему:

Аллилуиа.

(Сей кондак читается трижды. Затем Икос 1 и Кондак 1)

 

 

МОЛИТВА ПЕРВАЯ


О Царица Небесная! Кто изочтет великое множество чудес Твоих, кто исчислит вопли молитвенных прошений, токи умиленных слез, благодарных воздыханий, пролитых пред иконою Твоею.
Овеяна убо вся она скорбию народной, плачем угнетенных и радостною хвалою утешенных.

Припадаху к ней людие, понесшие агарянское иго, плакаху Москва в смутное время, взываше Курск в нашествие вражеское. Вопияше вся область во дни смертоносных болезней и бед, и вся скорби на радость прелагала еси. Темже и ныне благослови землю Русскую. Спаси от греха, погибели и соблазнов страну нашу. Излей благодать на труд земледельческий и на всякое благое начинание общественное.

Помяни, Пресвятая Дево, по имени всех предстоящих и молящихся и вся люди, требующая Твоего утешения, помощи и милосердия. Ты убо веси тайная сердец наших. Темже всем по потребе их прошения исполни. Изрядне же заблудших обрати к покаянию, нас же всех умудри светом Евангельския любви и добрых дел.

Архипастыри и пастыри и вся верныя в православии до смерти тверды покажи, в царство небесное управи и со Христом жити сотвори во веки веков. Аминь.

 

 

МОЛИТВА ВТОРАЯ

 

Царица наша Преблагая, Надеждо наша, Богородице, Приятелище сирых и странных Предстательнице, скорбящих Радосте, обидимых Покровительнице, зриши нашу беду, зриши нашу скорбь; помози нам, яко немощным, окорми нас, яко странных, обиду нашу веси, разреши ту, яко волиши, избави отечество наше, страждущую землю Российскую, от лютаго безбожников обстояния, спаси и сохрани рабов Твоих (имярек) и всех нас, зде предстоящих и молящихся, и покрый нас от всякаго зла честным Твоим Омофором, яко не имамы иныя Помощи разве Тебе, ни иныя Предстательницы, ни благия Утешительницы, токмо Тебе, о Богомати, яко да сохраниши нас и покрыеши во веки веков.

 


ТРОПАРЬ


Тропарь, глас 4

Яко необоримую стену и источник чудес стяжавше Тя раби Твои, Богородице Пречистая, сопротивных ополчения низлагаем. Темже молим Тя: мир граду Твоему даруй и душам нашим велию милость.

 

Кондак, глас 4

Честнаго образа Твоего знамение празднующе, людие Твои, Богородительнице, имже дивную победу на сопротивныя граду Твоему даровала еси. Темже Тебе верою взываем: радуйся, Дево, христиан похвало.

 

Величание

Величаем Тя, Пресвятая Дево, и чтим образ Твой честный, имже показала еси преславное знамение.

Обновлено 30.03.2012 07:08
 






Рейтинг@Mail.ru Рейтинг@Mail.ru Rambler's Top100 Яндекс.Метрика