Феодоровская икона Божией Матери
 
 
 







Феодоровская икона Божией Матери PDF Печать E-mail
Молитвы и о молитвах - Молитвы и акафисты перед иконами Божией Матери
13.11.2013 20:36

Феодоровская икона Божией Матери

1f

(14 / 27 марта; 16 / 29 августа)

  Главной святыней Костромского края является чудотворная Феодоровская икона Пресвятой Богородицы. Чудотворная Феодоровская икона Пресвятой Богородицы известна с XII века, когда она находилась в часовне близ старинного поволжского города Городца. Впоследствии здесь был основан мужской монастырь, именовавшийся Богородице-Феодоровским; чудотворный образ являлся главной святыней обители до 1239 года – когда монголо-татарские захватчики разорили и сожгли Городец, а икона исчезла из города.

   По преданию, подтверждаемому исследованиями современных историков, в описываемое время Феодоровская икона стала моленным образом святого благоверного великого князя Александра Невского, и именно этой иконой в 1239 году великий князь Ярослав Всеволодович благословил своего сына – святого князя Александра – на брак с полоцкой княжной Параскевой. Вместе с благоверным князем Феодоровская икона путешествовала в Орду, где святой Александр отстаивал интересы Русской земли; этот образ Пресвятой Богородицы он брал с собой в военные походы; перед ликом Феодоровской иконы Божией Матери благоверный князь, приняв монашество, завершил свой жизненный путь.

  Чудесное явление Феодоровской иконы в Костроме князю Василию Ярославичу, младшему брату святого Александра Невского, совершилось в конце 50-х – начале 60-х годов XIII столетия. Накануне явления, в день праздника Успения Пресвятой Богородицы, многие жители Костромы видели на улицах города воина с иконой Божией Матери на руках. В воине костромичи узнали святого великомученика Феодора Стратилата – по его иконописному изображению в соборном храме Костромы. На следующий день, 16 августа, по старому стилю, князь Василий Ярославич во время охоты увидел эту икону на ветвях дерева вблизи речки Запрудни. Обретенная святыня была торжественно принесена крестным ходом в Кострому и поставлена в соборном храме во имя великомученика Феодора Стратилата, после чего и стала именоваться Феодоровской.

   В память явления чудотворной Феодоровской иконы было установлено празднование, совершаемое 16/29 августа и традиционно сопровождаемое в Костроме общегородским крестным ходом из кафедрального собора к храму Спаса-на-Запрудне, воздвигнутому на месте явления святыни. Эта традиция, насильственно прерванная в ХХ веке, возрождена в 1990 году.

  14 марта, по старому стилю, 1613 года в костромском Свято-Троицком Ипатьевском мужском монастыре Михаил Феодорович Романов перед ликом чудотворной Феодоровской иконы принял избрание его Земским собором на престол государства Российского. По летописным свидетельствам, посланцы собора, представлявшие все сословия земли Русской, много часов просили Михаила Феодоровича и его мать, великую инокиню Марфу Иоанновну, принять соборное определение; согласие было получено лишь после обращения возглавлявшего посольство архиепископа Рязанского и Муромского Феодорита, призвавшего юного Михаила и его родительницу преклониться перед волей Божией. У чудотворного Феодоровского образа Пресвятой Богородицы Михаил Феодорович Романов принес обеты верности Отечеству, Православной Церкви и русскому народу. Со времени этого события, явившегося началом преодоления Великой смуты, Феодоровский образ Божией Матери и Свято-Троицкий Ипатьевский мужской монастырь града Костромы стали особо чтимыми святынями царственного дома Романовых, а в память о призвании Михаила Феодоровича на царство было установлено еще одно празднование иконе – 27 марта, по новому стилю.

   Со второй половины XVIII столетия многие члены царской семьи, в том числе все российские императоры, начиная с Николая I, считали своим долгом посетить Кострому – «колыбель дома Романовых» – и поклониться чудотворной Феодоровской иконе Пресвятой Богородицы. В 1913 году, в ходе общегосударственного празднования 300-летия дома Романовых, Кострому посетили святые царственные страстотерпцы – последний русский император Николай Александрович и его августейшая семья. Особое почитание чудотворного образа Божией Матери династией Романовых нашло свое выражение в постройке в Царском Селе Феодоровского городка с храмом во имя чудотворной Феодоровской иконы Божией Матери, а также в том, что переходившие из инославия в православную веру невесты членов царской семьи брали себе отчество «Феодоровна».

   В годы гонений на Церковь в ХХ столетии чудотворная Феодоровская икона Пресвятой Богородицы не покинула храмовых стен, сохранилась как церковная святыня. Учитывая духовно-культурную ценность и значимость иконы для Православия, этот случай является уникальным в новейшей истории Русской Православной Церкви. С 1991 года чудотворный образ хранится в Богоявленско-Анастасиином кафедральном соборе Костромы. Также с 1991 года ведется летопись современных чудес, совершающихся по молитвам у Феодоровской иконы; к настоящему времени таких событий зафиксировано более 100.

  Чудотворная Феодоровская икона Божией Матери с давних времен почитается православным народом как покровительствующая семейному благополучию, рождению и воспитанию детей, помогающая в трудных родах.

     29 августа 2002 года Божественную литургию и общегородской крестный ход, в котором приняли участие более 40 тысяч костромичей, в день празднования явления чудотворной Феодоровской иконы Божией Матери в ходе своего визита в Кострому впервые в истории возглавил Предстоятель Русской Православной Церкви Святейший Патриарх Московский и всея Руси Алексий II.

   В 1891 году московскими мастерами на добровольные пожертвования костромичей и жителей других областей России, при личном участии императора Александра III, для Феодоровской иконы Божией Матери была изготовлена золотая риза, украшенная драгоценными камнями, которые были собраны со всех концов России. Высокая художественная ценность ризы позволяла считать ее одним из выдающихся произведений ювелирного искусства ХIХ века.

    В марте 1922 года подкомиссией Губернской комиссии по изъятию церковных ценностей риза была снята с Феодоровский иконы и увезена в неизвестном направлении.

 

  С 20 июня по 15 июля чудотворная Феодоровская икона Божией Матери по благословению Святейшего Патриарха Алексия пребывала в пределах Краснодарского края и Республики Адыгея. Сотни тысяч православных верующих юга России впервые получили возможность поклониться этой древней святыне. По пути в Краснодар икона побывала в Москве, где к ней в рабочей Патриаршей резиденции на Чистом переулке приложился Предстоятель Русской Православной Церкви Патриарх Алексий II. Его Святейшество совершил молебен и передал в дар для этой иконы новую драгоценную ризу – копию утраченного в революционные годы оклада, который в 1891 году при личном участии императора Александра III был изготовлен на добровольные пожертвования костромичей и жителей других областей России.

 

 

АКАФИСТ

 

Кондак 1

 

Взбранной Воеводе, Пренепорочней Деве Богородице, Заступнице нашей и предстательству христиан непостыдному, явлением чудныя иконы Своея радование подавшей земле Российстей и вся верныя чада Церкве просветившей, благодарение усердно приносим Ти, Богородице, и припадающе пречудному образу Твоему умильно глаголем: спаси, Госпоже, и помилуй рабы Твоя зовущия: Радуйся, Мати Божия, Предстательнице и Заступнице наша усердная.

 

 

Икос 1

 

Ангел Гавриил от Бога послан бысть во град Назарет ко Пречистей Деве Марии, и вшед к Ней рече: радуйся, Благодатная, Господь с Тобою, благословенна Ты в женах. Ангельскому гласу подражающе, и мы, грешнии, радости благодарения в сердцы своем исполнени, пред явленным образом Твоим благохваления наша возносити к Тебе дерзаем, Пресвятая Богородице:

Радуйся, отрасле от корене Давидова благословенная;
Радуйся, обетом родителей в жертву Богу принесенная.
Радуйся, святых праведных Иоакима и Анны Дщи Богоданная;
Радуйся, триех лет во храм Божий введенная и тамо воспитанная.
Радуйся, тамо смирением и чистотою всех удивившая;
Радуйся, тамо Ангельския беседы сподобльшаяся.
Радуйся, Дево, о зачатии Бога Слова благовестие во смирении приемшая;
Радуйся, избранная Отроковице, к зачатию Бога Слова силою свыше осененная.
Радуйся, тайну воплощения Сына Божия, от веков в Бозе сокровенную, открывшая;
Радуйся, Агнице, рождшая Агнца Христа, вземшаго грехи мира.
Радуйся, Тобою бо избавляемся мук адовых;
Радуйся, Тобою бо сподобляемся Вечныя Жизни.
Радуйся, Мати Божия, Предстательнице и Заступнице наша усердная.

 

 

Кондак 2

 

Видя икону Твою, Пресвятая Дево, на древе стоящу, князь благочестивый костромский ужасом многим содрогашеся недоумея, что бысть видение сие. Хотящу же ему прияти ю и от сего свыше удержану ему бывшу, не можаше: уведев, яко чудно есть иконы тоя явление, воззва к Богу Аллилуиа.

 

 

Икос 2

 

Разумом желая разумети князь благочестивый пришествие пречудного Твоего образа во град Кострому, Богородице, душею радования преисполненною себе предаде водительству Божию, и преклонь колена, со страхом вопияше Тебе:

Радуйся, Дево, явльшая образ Свой чудно;
Радуйся, Благословенная, в явлении образа Своего милосердие нам являющая.
Радуйся, о всех чтущих Сына Твоего промышляющая;
Радуйся, всем просящим у Тебе дары, в меру веры, ко спасению подающая.
Радуйся, путь истины заблуждшим показующая;
Радуйся, к Горнему миру чудесы твоими ум наш возводящая.
Радуйся, смущения помышлений сумнительных удаляющая;
Радуйся, славящих Тя всегда прославляющая.
Радуйся, чистотою Твоею чистоте нас научающая;
Радуйся, чистотою Твоею нечистоту нашу обличающая.
Радуйся, моления наша приемлющая;
Радуйся, рыданий и слез неотметающая.
Радуйся, Мати Божия, Предстательнице и Заступнице наша усердная.

 

 

Кондак 3

 

Силу Божию благочестивый князь познав в восхождении образа чуднаго Твоего, Богомати, в явлении же видев милосердие Твое ко всем, спасение хотящим получити, рече: Аллилуиа.

 

 

Икос 3

 

Имев помысл стяжати даруемое Небесное сокровище, Лик Твой светлый, Богомати, второе простре державный руку к образу низшедшему: узрев же паки его восхождение, скоро пойде во град и поведа о бывших ему Освященному Собору, да пришедше и видяще иконы Твоея явление возопиют с ним вернии:

Радуйся, Царице Небесе и земли;
Радуйся, Престоле Царя царствующих.
Радуйся, Пренепорочная Дево;
Радуйся. Мати Непреступнаго Света.
Радуйся, Честнейшая Херувим;
Радуйся, Славнейшая без сравнения Серафим.
Радуйся, Небесными Силами величаемая;
Радуйся, от всех земнородных ублажаемая.
Радуйся, неизреченное веселие Ангелов;
Радуйся венче царственный всех пророков и апостолов.
Радуйся, православия Христовы Церкве ограждение;
Радуйся, всех суемудрых учений и ересей низложение.
Радуйся, Мати Божия, Предстательнице и Заступнице наша усердная.

 

 

Кондак 4

 

Бурю внутрь имея помышлений недоуменных, Освященный Собор со псалмы и песньми духовными абие притече видети образ Твой Неискусобрачная. Узрев же его на древе дивно стояща и благолепно красотою сияюща, рече: Аллилуиа.

 

 

Икос 4

 

Слышаша людие честныя иконы Твоея, Богоотроковице, пришествие, и ко оной текше покланяхуся, аки Самей Тебе сущей, и со умилением и слезами вопияху к Тебе:

Радуйся, Дево, благословенная. в женах, во чреве Твоем Носителя всяческих носившая;
Радуйся, рождением Сына Твоего спасение миру всему явльшая.
Радуйся, человеки с Богом соединившая;
Радуйся, Превышшая Небес, избавльшая нас от клятвы.
Радуйся, нас к Вечней Жизни руководящая;
Радуйся, Владычице мира.
Радуйся, Божие к смертным благоволение;
Радуйся, смертных к Богу дерзновение.
Радуйся, благих во благости соблюдающая;
Радуйся, лукавых на путь благий обращающая.
Радуйся, под сень крова Твоего прибегающих милующая;
Радуйся, уповающим на Тя вся потребная к животу и благочестию дарующая.
Радуйся, Мати Божия, Предстательнице и Заступнице наша усердная.

 

 

Кондак 5

 

Яко Боготечную звезду узреша людие икону Твою, Безневестная Дево, и яко многосветлый светильник поставиша ю во святем соборнем храме, радующеся и вопиюще Богу: Аллилуиа.

 

 

Икос 5

 

Видевше жителие града Городца образ Твой, Владычице, во храме града Костромы стоящий, и на руку Твоею держима Богомладенца Иисуса, скорбию одержими беша: зане отшествие его бысть из града их. Мы же, обрадовани благоволением Твоим ко граду нашему, приносим Ти дары, и с любовию лобызающе Твой святый образ, вопием Ти:

Радуйся, Звездо, Солнце Правды нам явльшая;
Радуйся, возлюбившая сию страну.
Радуйся, обретение Тебе ищущих;
Радуйся, радостию неизреченною верных сердца исполняющая.
Радуйся, сокровище благодати неистощимое;
Радуйся, милости приснотекущий источниче.
Радуйся, от тяжких бед спасающая;
Радуйся, от смертоносныя язвы избавляющая.
Радуйся, всего мира Ходатаице;
Радуйся, всех недугующих Целительнице.
Радуйся, красото несравненная;
Радуйся, доброто несказанная.
Радуйся, Мати Божия, Предстательнице и Заступнице наша усердная.

 

 

Кондак 6

 

Проповедницы богоноснии быша видевшии образ Твой, Богородице. Возвращся бо кийждо во страну свою, возвещаше о пришествии его и чудесех от него бываемых, воспевая Богу: Аллилуиа.

 

 

Икос 6

 

Возсиявша благодать от чуднаго образа Твоего, Чистая, веру немощствующих утверди, верных же возвесели сердца любовию. Сего ради радующеся вопием Ти:

Радуйся, Пресвятая Дево, светом Небесныя истины нас озаряющая;
Радуйся, мглу греховную от нас отгоняющая.
Радуйся, чудесы Твоими к Боговедению нас приводящая;
Радуйся, всех кающихся грешник ко благочестию подвизающая.
Радуйся, всех притекающих к Тебе крепкое заступление;
Радуйся, немощствующих умом утверждение.
Радуйся, изнемогающих в вере возставляющая;
Радуйся, тихое пристанище в море житейстем обуреваемым.
Радуйся, злыя советы сынов погибельных открывающая;
Радуйся, вознесенную гордыню врагов отечества нашего смиряющая.
Радуйся, православных царей Державо;
Радуйся, всех христиан Похвало.
Радуйся, Мати Божия, Предстательнице и Заступнице наша усердная.

 

 

Кондак 7

 

Хотя прославити Сын Твой, Богородице, святую икону Твою во граде Костроме, повеле ю в день Успения Твоего святому великомученику Феодору Стратилату носити по граду сему, да вси видяще чудо сие благодарным сердцем возопиют Ему: Аллилуиа.

 

 

Икос 7

 

Чудо новое яви нам Господь мольбами Твоими, Богородице, егда сгоревшу храму, в немже бе поставлен святый образ Твой, сохрани его в пепле невредима от огня, и тако мневших сгоревша его печаль в радость преложи. Мы же, чудо сие ведяще, воспеваем Ти таковая:

Радуйся, Купино Неопалимая;
Радуйся, огненный Столпе, сущия во тьме наставляяй.
Радуйся, Животе, Духом позлащенный, невместимаго Бога вместивший;
Радуйся, кадильнице златая, яко фимиам благоуханный, молитвы Твоя за ны к Богу Сыну присно возносящая.
Радуйся, Жезле Ааронов к явлению в мир Сына Твоего прозябший;
Радуйся, Руно Гедеоново, благодатию Божиею во спасение наше орошенное.
Радуйся, Горо несекомая, от Неяже отсечеся краеугольный Камень Христос;
Радуйся, Храме одушевленный, в немже вселися Божество телесне.
Радуйся, девства охранение;
Радуйся, супружества благословение.
Радуйся, паче всех Господа возлюбившая;
Радуйся, паче всех от Него превознесенная.
Радуйся, Мати Божия, Предстательнице и Заступнице наша усердная.

 

 

Кондак 8

 

Странное чудо видевше, на воздусе икону Богоматери стоящу, аки руками Ангельскими держиму, егда второе сгоре храм, в немже стоявше явленная сия икона, отвержемся, людие, мира сего, ум на Небеса преложше: сего бо ради и дадеся нам чудная икона Богородицы, да взирающе на ню горняя мудрствуем, а не земная, вопиюще к Богу: Аллилуиа.

 

 

Икос 8

 

В Вышних пребывающи Селениих, и нижних не разлучилася еси, Богородице, чудесы Твоими всех просвещающи приходящих к Тебе верою: сего ради и слышиши от нас сия:

Радуйся, Мати Христа Бога нашего, на Небеси пребывающая;
Радуйся, на земли нас не оставляющая.
Радуйся, ради величества Твоего на Небеси Ангелы окруженная;
Радуйся, ради славы Твоея на земли от человек прославляемая.
Радуйся, Тебе бо служат вся Небесныя Силы;
Радуйся, Тебе бо, по Бозе, хваление возносят Херувими и Серафими.
Радуйся, лице Божие выну на Небеси созерцающая;
Радуйся, пред престолом Сына Твоего Матерния руце Твои за ны молящися простирающая.
Радуйся, нас сущих на земли от всякаго зла омофором Твоим покрывающая;
Радуйся, верных от всяких душепагубных дел удаляющая.
Радуйся, рождением Сына Божия двери Царства Христова нам отверзшая;
Радуйся, надеждою прияти небесных благ верных души услаждающая.
Радуйся, Мати Божия, Предстательнице и Заступнице наша усердная.

 

 

Кондак 9

 

Всякое естество Ангельское превозносит Тя, Дево, великия ради любве Твоея к роду христианскому: незрима бо и неприступна, яко Мати Бога от земли к Небеси возшедшая, Пречистым Твоим образом зриму и приступну Себе являеши всем воспевающим Сыну Твоему: Аллилуиа.

 

 

Икос 9

 

Ветия многовещанныя, яко рыбы безгласны зрим о Тебе, Богородице: недоумевают бо глаголати о славных чудесех, от явления Твоея иконы бываемых. Мы же онем дивящеся благодарно вопием Ти:

Радуйся, слепых прозрение;
Радуйся, хромых хождение.
Радуйся, от темных и лукавых духов исцеляющая;
Радуйся, лучами от Твоего Пречистого образа изшедшими врагов земли нашея отгнавшая.
Радуйся, больным видение Твое даровавшая;
Радуйся, молящимся явленней иконе Твоей исцеление подающая.
Радуйся, расслабленных от одра болезни воздвигающая;
Радуйся, немым разрешающая уста.
Радуйся, от плена вражия возвращающая;
Радуйся, лютыя плоти страсти утоляющая.
Радуйся, души верных неизреченным милосердием Твоим умиляющая;
Радуйся, неизглаголанным Твоим человеколюбием унывающих ободряющая.
Радуйся, Мати Божия, Предстательнице и Заступнице наша усердная.

 

 

Кондак 10

 

Соблюсти хотящи в чистоте домостроительство Церкве Православныя, Чистая, и утвердити скипетр державы Российские чудною иконою твоею вложила еси в сердце благовернаго государя Михаила Феодоровича прияти венец царский земли Российския, да вси видящии видят, яко Вышний владеет царством, и емуже хощет дает е, и возопиют Ему: Аллилуиа.

 

 

Икос 10

 

Стена еси необоримая, Богородице Дево, всем к Тебе прибегающим: никтоже бо притекайя к Тебе тощь отходит. Сего ради ущедряеми милостию Твоею, во умилении души возглашаем Тебе:

Радуйся, твердая стено, от враг видимых и невидимых охраняющая;
Радуйся, крепкая защите упование на тя возложившим.
Радуйся, познания истины чистое зерцало;
Радуйся, сохранения веры крепкое забрало.
Радуйся, грады и страны христианския предстательством Твоим от врагов спасающая;
Радуйся, царем благоверным поборающая.
Радуйся, мир в градех селящая;
Радуйся, благонравным благопоспешающая.
Радуйся, силою молитв Твоих злыя помыслы в ничтоже обращающая;
Радуйся, силы врагов ближняго сокрушающая.
Радуйся, юности наставление;
Радуйся, старости поддержание.
Радуйся, Мати Божия, Предстательнице и Заступнице наша усердная.

 

 

Кондак 11

 

Пение всякое побеждается спростретися тщащееся множеству многих щедрот Твоих: равночисленныя бо песку морскому песни аще приносим Ти, Богородице Дево, ничтоже совершаем достойно, яже даровала еси нам вопиющим к Богу: Аллилуиа.

 

 

Икос 11

 

Светоприемную свещу, древле явльшуюся, зрим во святей иконе Твоей, Богородице Дево, егда град наш защитила еси от разорения врагов земли нашея лучами, от святая твоея иконы исходящими. Сего ради с верою припадающе к ней и с любовию лобызающе ю, вопием Ти:

Радуйся, Мати, Превечнаго Света Христа, учением Его души просвещающая;
Радуйся, благодатию Божиею неверующих к вере в Бога приводящая.
Радуйся, путешествующим спутешествующая;
Радуйся, нуждно плавающих Кормчая.
Радуйся, от всякия скорби, гнева и нужды спасающая;
Радуйся, от глада, губительства, труса и огня сохраняющая.
Радуйся, избавляющая от иноплеменных;
Радуйся, охраняющая от междоусобныя брани.
Радуйся, в святей иконе Твоей яко солнце в костромских пределах возсиявшая;
Радуйся, зде отрасль царственную возвеличившая.
Радуйся, Тобою бо утверждаются царства;
Радуйся, Тобою бо венчаются царие.
Радуйся, Мати Божия, Предстательнице и Заступнице наша усердная.

 

 

Кондак 12

 

Благодать приявшая от Бога Сына Твоего, Дево Богородице, и ту древле излиявшая на всех прибегающих к образу Твоему, не лиши ныне и нас богатыя Твоея милости, даруй нам покаяние о гресех, да чистым сердцем и устны взываем к возлюбленному Сыну Твоему и Богу нашему: Аллилуиа.

 

 

Икос 12

 

Поюще Твоя милости и чудеса, хвалим Тя вси, Богородице, и яко древлий Израиль к Кивоту Завета притекаем ко образу лица Твоего, и из глубины души вопием: воздвигни руце Твоя к Сыну Твоему, да подаст нам вся благая и спасительная с верою и любовию вопиющим Ти:

Радуйся, утешение наше в скорбех;
Радуйся, утоление печалей наших.
Радуйся, радосте наша бесконечная;
Радуйся, светлосте и отрадо сердечная.
Радуйся, надеждо наша крепкая;
Радуйся, сирым приятелище.
Радуйся, странным прибежище;
Радуйся, обидимым покровительнице.
Радуйся, оклеветаемых оправдание;
Радуйся, благих защищение.
Радуйся, тела моего врачевание;
Радуйся, души моея спасение.
Радуйся, Мати Божия, Предстательнице и Заступнице наша усердная.

 

 

Кондак 13

 

О премилосердая Заступнице наша, великия ради милости Твоея даровавшая отечеству и граду нашему чудотворную икону Твою во освящение, утешение и ограждение наше, нынешнее приемши славословие, от всякаго злаго обстояния избави нас, рабы Твоя, даруя нам здравие и спасение, на враги победу и одоление, и всех нас вечных мук свободи, устнами, душею же и сердцем вопиющих: Аллилуиа.

 

(Этот кондак читается трижды, затем икос 1 и кондак 1)

 

 

МОЛИТВА

 

О Пресвятая Владычице Богородице и Приснодева Марие, единая Надеждо нам грешным, к Тебе прибегаем и Тебе молим, яко велие имаши дерзновение пред рождшимся от Тебе по плоти Господом Богом и Спасителем нашим Иисусом Христом. Не презри слез наших, не возгнушайся воздыханий наших, не отрини скорби нашея, не посрами упования нашего на Тя, но матерними молении Твоими умоли Господа Бога, да сподобит нас грешных и недостойных свободитися от грехов и страстей душевных и телесных, умрети миру и жити Ему Единому по вся дни живота нашего. О Пресвятая Владычице Богородице, путешествующим путешествуй и ограждай и охраняй оныя, избави плененных от пленения, свободи страждущих от бед, утеши сущих в печали, скорбех и напастех, облегчи нищету и всяко злострадание телесное и даруй всем вся потребная к животу, благочестию и жизни временней. Спаси, Владычице, вся страны и грады и сию страну и сей град, имже сия чудотворная и святая икона Твоя дадеся во утешение и ограждение, избави я от глада, губительства, труса, потопа, огня, меча, нашествия иноплеменных, междоусобныя брани и отврати всякий гнев на ны праведно движимый. Даруй нам время на покаяние и обращение, избави нас от внезапныя смерти и во время исхода нашего предстани нам явльшися, Дево Богородице, и избави нас от воздушных мытарств князей века сего, сподоби на Страшном Судищи Христовом стати одесную и соделай нас снаследники вечных благ, да славим во веки великолепое имя Сына Твоего и Бога нашего со Безначальным Его Отцем и Святым и Благим и Животворящим Его Духом, ныне и присно, и во веки веков. Аминь.

 

 

ТРОПАРЬ

 

Тропарь, глас 4

 

Днесь светло красуется преименитый град Кострома и вся Русская страна, созывающи к веселию вся боголюбивыя народы христианския, на преславное торжество Божия Матере, пришествия ради чудотворнаго Ея и многоцелебнаго образа, днесь бо явися нам пресветлое великое солнце, приидите, вси Богоизбраннии людие, новый Израиль, ко источнику цельбоносному, источает бо нам неоскудныя милости Пресвятая Богородица и избавляет вся грады и страны христианския невредимы от всех навет вражиих. Но, о Всемилостивая Госпоже Дево Богородице Владычице, спаси страну нашу, и архиереи, и вся люди Твоего достояния от всех бед по велицей Твоей милости, да зовем Ти: Радуйся, Дево, христианом похвало

 

 

Кондак, глас 8

 

Притецем, людие, вси к тихому и доброму пристанищу, в дом Божия Матере, чудному образу Царицы и Богородицы, за неизреченную милость Ея явленному, верно припадающе и вопиюще: о Всемилостивая Владычице, за спасительное Твое смотрение,  уднаго образа к нам пришествие, посети нас, грешных, светло сотворяющих празднество Твое,  крепи страну нашу, дивно на враги победу подающи, и веру утверди. Церковь Сына Твоего непоколебиму соблюди, притекающих к Тебе спаси, от всяких напастей избави,  охраняющи в мире все Православие, да зовем Ти: Радуйся, Невесто Неневестная.

 

  

 

КАНОН

 

(Феодоровской иконе Божией Матери)

 

 

Тропарь, глас 4

 

Пришествием честныя Твоея иконы, Богоотроковице, обрадованный днесь Богохранимый град Кострома, якоже древний Израиль к Кивоту Завета, притекает ко изображению лица Твоего и воплотившагося от Тебе Бога нашего, да Твоим Матерним к Нему предстательством присно ходатайствуеши всем, под сень крова Твоего прибегающим, мир и велию милость.

 

 

Канон, глас 4

 

Песнь 1

 

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

 

Припев: Пресвятая Богородице, спаси нас.

 

Отверзый ум разумети Писания учеником Твоим, Господи, отверзи ныне и наша сердца к разумению величия Твоего и Матери Твоея, да с Нею Боголепно прославим Тя.

 

Пресвятая Богородице, спаси нас.

 

Отверсти толкущим двери милосердия Твоего обетовавый, Владыко наш, отверзи нам утробы человеколюбия Твоего, имея на сие молящую Тя Ходатаицу.

Слава: Отверсто иногда бысть молитвою Илииною небо, ради беззаконновавшаго Израиля заключенное, отверст да будет и нам, грешным, вход в Небесная предстательством Твоим, Богородительнице.

И ныне: Отверзшая Рождеством Твоим врата вечная, Богородительница Пречистая, отверзи предстательством Твоим заключенныя сердец наших двери, да Сын Твои и Бог наш внидет и освятит я.

 

 

Песнь 3

 

Ирмос: Твои песнословцы, Богородице, Живый и Независтный Источниче, лик себе совокупльшия, духовно утверди, в Божественней Твоей славе венцев славы сподоби.

 

Пресвятая Богородице, спаси нас.

 

Твоего плотскаго еже на земли смотрения да незабвенно устроиши воспоминание, дал еси нам, Владыко, икону Твою и Рождшия Тя, темже, взирающе на оную, молим Тя: руководи нас к познанию и люблению Тебе, воплощеннаго Бога и Спаса душ наших.

 

Пресвятая Богородице, спаси нас.

 

Твоея Пренепорочныя Матере всечестный образ любовию объемлюще, из глубины души взываем к Тебе, живущему на Небесех: начертай на сердцах наших красный образ добродетелей Ея, да величаем Тя, Господа и Cnаса нашего.

Слава: Твои всечестный образ, Владычице, любезно на земли приемлюще, зовем к Тебе, сущей во славе Небесней, да присно ходатайствуеши нам благодать мыслити и творити достойная Твоего величия, еже сотвори Тебе Сильный.

И ныне: Твоих благодеяний воспоминание, творимое днесь, движет сердца наша со устнами к благохвалению Твоему, Владычице, но сотвори, да и красный лик Твоих добродетелей привлечет сердца наша к люблению и подражанию оных.

 

Господи, помилуй (трижды). Слава, и ныне:

 

 

Седален, глас 3

 

Сии людие устнами чтут Мя, сердце же далече отстоит от Мене, – рече иногда Господь Вседержитель ко иудеем, един внешний вид благочестия являющим. Но да и мы не туюжде с ними часть и осуждение восприимем, братие, всячески блюдемся дел, подобных лицемерию. Сего ради празднующе и всечестный сей праздник, да не явимся извне точию благоговейны, внутрь же уду зли и нечестивии пред Испытующим сердца и утробы, в простоте сердца поклонимся Ему, якоже Сам рече, Духом и истиною, да тако будем подражатели Пресвятей Деве, в Нейже не глас точию, но паче душа величаше Господа и Дух радовашеся о Бозе, Спасе Своем.

Слава, и ныне: Покрова Твоего Божественнаго, Пречистая Богородице Владычице, да не отъимеши от рабов Твоих, молят Тя угодники Сына Твоего: великомученик Феодор Стратилат и преподобнии чудотворцы, страны сея Костромския и Галицкия заступницы, ихже моление приими и помилуй нас.

 

 

Песнь 4

 

Ирмос: Седяй в Славе на Престоле Божества во облаце легце, прииде Иисус Пребожественный Нетленною Дланию и спасе зовущия: слава, Христе, силе Твоей.

 

Пресвятая Богородице, спаси нас.

 

Седяй одесную Престола величествия на высоких, снизшел еси к дольнейшим странам земли и, вселився во чрево смиренномудрыя Матере Девы, явил еси мирови, яко Ты призираеши на смирение рабов Твоих и даеши им благодать Твою, еяже да и мы сподобимся, даруй нам быти ревнители смиренномудрыя Твоея Матере.

Пресвятая Богородице, спаси нас.

 

Седяй на рамех Херувим и Серафим, благоволил еси плотию седети на объятиих Чистейшия Отроковицы, да сим покажеши нам, яко Ты, Святе святых, обитавши в сердцах единых любителей чистоты и целомудрия, егоже рачители и нас покажи молитвами рождшия Тя.

Слава: Седящему во Славе на Престоле Божества сподобилася еси Матерь быти, ради изящнейшия чистоты и смиренномудрия, ихже любители и нас покажи молитвами Твоими, да и мы сподобимся части, уготованной рачителем чистоты и смиренномудрия Твоего.

И ныне: Седети во Славе Сына Твоего сподобившаяся, Пренепорочная Дево, не престай молящи благость Его, да и мы, взирающе на образ святыя жизни Твоей и оному нашим жительством сообразующеся, тояжде славы на Небесех будем причастницы.

 

 

Песнь 5

 

Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.

 

Пресвятая Богородице, спаси нас.

 

Ужасахуся и смущахуся костромстии жителие, мневше знамение Твоего о них Промысла, икону Матере Твоея, во пламени сгоревшу, но сие смущение пременил еси в радость, Господи, показав им абие образ сей, от огня и пепела невредим. Сице да и мы, по обуревающих нас искушениях и напастех, присно радуемся о Твоем, еже о нас благоволении, молим Тя, Человеколюбче.

 

Пресвятая Богородице, спаси нас.

 

Ужасошася иногда полки нашедших на град Кострому супостатов, егда от воображения зрака лица Твоего, Господи, и Пресвятыя Твоея Матере пустил еси на сих стрелы молниины, но сей ужас да вложиши в сердца и всех, стремящихся ратоборствовати достояние Твое, молим Тя с Ходатаицею нашего избавления.

Слава: Ужасни и скорбни бывше жителие Городца, узревше икону Твою, Богомати, пренесену во град Кострому: мняху бо себе сим пренесением лишенных быти Твоего о них Матерняго благоволения, но да не и мы, таковою же иногда скорбию объяти, будем лишени знамений Твоего покровительства, не престай, Владычице, пребывающи с нами Твоею милостию.

И ныне: Яко очи рабыни в руку госпожи своея, тако очи наши всегда к Тебе возводим, о Многоблагоутробная Госпоже наша и Спасительнице Всесвятая Богородице! Призри убо на ны милостивно, царствующая на Небеси с Сыном Твоим и Богом, и ущедрити ны, грешныя, потщися, яко вся Тебе возможна суть.

 

 

Песнь 6

 

Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.

 

Пресвятая Богородице, спаси нас.

 

Божественное Твое разумеем истощание, Иисусе, Боже наш, егда, взирающе на образ Матере Твоея, зрим Тя с Нею яко Младенца, руками Ея держима, темже благодаряще сему Твоему еже к нам снизхождению, молим Тя, нас ради младенствовавшаго, быти нам милостива о гресех наших.

 

Пресвятая Богородице, спаси нас.

 

Божественнаго Твоего воплощения еже от Девы, да присно славится таинство, даровал еси нам, Христе Царю, всечестную Матере Твоея икону с воображенным на ней видом Пречистаго лица Твоего, темже и молим Тя, Вседаровитый Господи, да даси нам присно славити воплощение Твое, имже человецы Божеству соединихомся.

Слава: Божественнаго Духа нашествие бысть на девственную утробу Твою, Богомати, егда Сына Превечнаго плотию зачала еси, Егоже да и мы в сердцах наших присно имамы, ходатайствуй нам благодать Тогожде Всесвятаго Духа, еюже бывают человецы таинственною обителию Отца и Сына.

И ныне: Божественных писаний любомудрое рачение с присным во храме Господни пребыванием сотворити Тя избранный ипостасныя Божия премудрости Храм, но да и мы устроимся храмы Тогожде Бога Жива, исходатайствуй нам благодать усердно внимати и последовати Сына Твоего гласу, Иже присно во храмех Его проповедуется.

 

Господи, помилуй (трижды). Слава, и ныне:

 

 

Кондак, глас 8

 

Благодарственная приносяще Ти, раби Твои, Богородительнице, о всех, имиже благодеяла еси граду нашему, из глубины души взываем к Тебе и милися деем: не престани, Владычице, Матерними к Сыну Твоему и Богу нашему молитвами подавати вся благая и спасительная всем, верою и любовию вопиющим Ти: радуйся, Дево, христиан похвало.

 

 

Икос

 

Стена еси девам, Богородице Дево, и всем, к Тебе прибегающим, ибо Небесе и земли Творец устрои Тя, Пречистая, вселься во утробе Твоей и вся приглашати Тебе научив:

Радуйся, столпе девства;
Радуйся, дверь спасения.
Радуйся, Начальнице мысленнаго наздания;
Радуйся, Подательнице Божественныя благости.
Радуйся, Ты бо обновила еси зачатыя студно;
Радуйся, Ты бо наказала еси окраденныя умом.
Радуйся, тлителя смыслов упраздняющая;
Радуйся, Сеятеля чистоты рождшая.
Радуйся, Чертоже безсеменнаго уневещения;
Радуйся, верных Господеви сочетавшая.
Радуйся, добрая Младопитательнице девам;
Радуйся, Невестокрасительнице душ святых.
Радуйся, Невесто Неневестная.

 

 

Песнь 7

 

Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.

 

Пресвятая Богородице, спаси нас.

 

Не служите твари паче Творца законоположивый человеком, Спасе наш, сотвори, усердно молим Тя с Богородицею, да, Духом Твоим просвешаеми, не к рукотворенным изображением относим Боголепное служение, но чрез образ Твой возносимся умы и сердцы, к Единому Тебе, отцев Богу благословенному.

 

Пресвятая Богородице, спаси нас.

 

Не послужиша бывшии в пещи Вавилонстей мудрии юноши бездушному истукану, но Единому Тебе, во образе Ангела посреде пламене явльшемуся Сыну Божию, поклонишася, ихже лику и части сопричти и всех, изображением сладчайшаго зрака Твоего движимых к прославлению Тебе, отцев Богу благословеннаго.

Слава: Не послужила еси Богу нравом плотских иудеев, Пренепорочная Дево, но духом и истиною, яко истинная Раба Его, покланялася еси Ему. Темже да и мы с Тобою истиннии будем поклонницы Его, ходатайствуй нам благодать, еже не в суеверном Богопочитании, но во истинном благочестии и вере служити отцев Богу благословенному.

И ныне: Не послужила еси миру и суете его, Богородительнице, но, всему предпочетши Единаго Бога и закон Его, была еси усерднейшая всех Раба Господня, темже и сподобилася еси послужити велией тайне Божия воплощения, яко Богоматерь, но сотвори, да и мы, отвергшеся мира и яже суть в мире, вседушно прилепимся и послужим Единому отцев Богу благословенному.

 

 

Песнь 8

 

Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

 

Пресвятая Богородице, спаси нас.

 

Отроча младо нашего ради спасения был еси, Безлетный Боже наш Иисусе, Егоже воображение зряще на священней иконе, усердною в Тя верою вопием Ти: буди Воспитатель, Наставник и Покровитель младенцем и отроком нашим, да и сии во истинней вере навыкнут глаголати Тебе: Господа пойте, дела, и превозносите Его во вся веки.

 

Пресвятая Богородице, спаси нас.

 

Отрок дванадесятолетен бывый, Иисусе, посреде старец и учителей во святилищи пребывая, послушал еси их и, совопрошася с ними, являл еси святую ревность к Божественному закону, да сим и наша отроки наставиши тщатися во время юности стяжавати духовную, яже от закона Твоего премудрость, да и они научатся сердцы и усты, словесы же и делы превозносити Тя во вся веки.

Слава: Отроки от пещи Вавилонския избавльшему Господу молися прилежно, Богоневестная Отроковице, да дарует всем, под кров Твой прибегающим, неврежденным быти от огня искушений и пламене похотей, да, тако Тобою избавльшеся, чистыми душами и нескверными устнами благословим с Тобою Единаго Избавителя Господа и превозносим Его во вся веки.

И ныне: Отроковицам Твое целомудрие и чистота да будет красота и слава, чревоносящим Твое безболезненное и святое Рождество да будет сладкое утешение и отрада, всем же, всякаго пола и возраста чтущим Тя, Богоневесто, добродетели Твоя да будут единым упражнением их, яко сими токмо достойне от человека прославляется Господь, живый во веки.

 

 

Песнь 9

 

Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная, Богородице, Чистая Приснодево.

 

Пресвятая Богородице, спаси нас.

 

Всякое колено Небесных, и земных, и преисподних да покланяется Тебе, яко носящему в Себе неизменный Преблаженнаго Отца Твоего образ, Иисусе. С нимиже и мы, верою просвещаеми, Тя, Истиннаго Бога, образ человеч от Девы приимшаго, Боголепно величаем.

 

Пресвятая Богородице, спаси нас.

 

Всяка уста да заградятся суесловящих, яко несть достойно чествовати Твою и Пречистыя Матере Твоея икону, Владыко: се бо, прославив сию чудесами, научил еси достояние Твое Тебе и во образе плоти Твоея с Пренепорочною Твоею Материю прославляти и величати.

Слава: Вси роди верных, по проречению Твоему, блажат Тя, Благословенная, Христа Бога нашего Мати. С ними же и мы, верою совокуплени, благоговейно чтуще священное лица Твоего изображение, прославляем Твоя величия, яже сотвори Тебе Господь Сил, с Ним же Тя величаем.

И ныне: Всяк язык смертных, по достоянию, изнемогает величати Тя, над всеми превознесенную, о Богоневесто! Темже и мы, прославляюще Тя днесь, исповедуем наше крайнее неможение, но, сие исповедующе, молим Тя, да по множеству щедрот Твоих, приимеши малое сие приношение, во знамение многия любве и усердия нас, величающих Тя.

 






Рейтинг@Mail.ru Рейтинг@Mail.ru Rambler's Top100 Яндекс.Метрика