Жировицкая икона Божией Матери
 
 
 







Жировицкая икона Божией Матери PDF Печать E-mail
Молитвы и о молитвах - Молитвы и акафисты перед иконами Божией Матери
24.01.2012 19:12

Жиро̀вицкая икона Божией Матери

Жиро̀вицкая икона Божией Матери 

икона Божией матери  «ЖИРОВИЦКАЯ»

7 / 20 мая


Явление иконы Божьей Матери ЖИРОВИЦКАЯ произошло в 1470 году в местечке Жировицы Гродненского уезда (ныне – Белоруссия). В лесу, принадлежащем православному литовскому вельможе Александру Солтану, пастухи увидели необыкновенно яркий свет, проникавший в виде пламени сквозь ветви грушевого дерева. Пастухи подошли ближе и увидели на дереве небольшую икону Божией Матери в лучезарном сиянии. Пастухи отнесли её к своему господину. Однако вельможа не придал особого значения рассказу пастухов, но образ взял и запер его в ларец. 

На следующий день у Александра Солтона собрались гости, и хозяин решил показать им находку, но иконы в ларце не оказалось. Через некоторое время пастухи опять нашли образ Богородицы на том же месте и опять принесли его своему господину. На этот раз Александр отнёсся к иконе с большим благоговением, нежели прежде, и дал обет на месте явления иконы Богородицы соорудить храм. Скоро небольшой деревянный храм был сооружен, и в него перенесли икону Пресвятой Богородицы.

В начале XVI столетия в церкви внезапно случился пожар. Несмотря на усилия жителей потушить огонь, спасти храм не удалось. Все решили, что в огне погибла и икона Божьей Матери. Но однажды малолетние дети увидели на горе, у подножия которой находился сгоревший храм, сидящую на камне Деву в лучезарном сиянии. Дети поспешили известить об увиденном своих домашних. Принимая сказанное детьми за Божественное откровение, все отправились на гору и, подойдя к камню, увидели на нём горящую свечу и Жировицкую икону Пресвятой Богородицы, нисколько не пострадавшую от пожара. Вскоре жители выстроили новый каменный храм и поставили в нём чудотворный образ. 

Впоследствии около храма возник мужской монастырь. Ныне чудотворная Жировицкая икона Божией Матери находится в соборе в честь Успения Пресвятой Богородицы Жировицкого мужского монастыря в Белоруссии.

 

 

 

АКАФИСТ



Кондак 1


Избранной от всех родов Царице и Владычице похвальныя песни принесем, яко Ходатаице и Заступнице рода христианскаго. Ты же, яко благая, Предстательница пред Господом умоли Сына Твоего и Бога нашего, даровати нам наследие благ вечных, да радующеся о тебе взываем:

Радуйся, Премилосердная Владычице, предстательство наше и всерадостное заступление.

 

Икос 1


Архангел Гавриил, с небес посланный к тебе, Дево чистая веща Ти: Радуйся, Благодатная Господь с Тобою! Мы же благадатиею Божиею чрез тебе озареннии, восхвалим Тя песньми сицевыми: Радуйся, предъизбранная прежде веков Советом Божиим;

Радуйся, Агнице, родившая Агнца Божия, вземлющаго грехи мира. Радуйся, сокровищнице спасения нашего, превысшая сил Ангельских;

Радуйся, Отроковице пренепорочная и Матерь Света.

Радуйся, горо несекомая, источник воды живыя источившая; Радуйся, Раю цветоносный, Божественное Древо жизни произрастившая.

Радуйся, Богообрадованная Мати, радость небу и земли родившая; Радуйся, силою Всевышняго осененная, Божественный клас, Спасителя миру, прозябшая.

Радуйся, Премилосердная Владычице, предстательство наше и всерадостное заступление.


Кондак 2


Видя верныя чада Твоя в бедах житейских унывающия и помощи небесныя от Тебе требующия, Ты, Богомати, надеждо христианом, чудесным явлением на древе святыя Твоея иконы насельником веси Жировицкия, исполнила еси радостию и веселием скорбныя сердца их, да вси благодарственно вопиют в Тебе Богу: Аллилуиа.


Икос 2


Разумом не уразумев тайны чудеснаго явления на древе иконы Твоея, Пречистая Владычице, скры болярин Солтан в ковчеге явленный Тобою пречестный образ Твой. Ты же, Дево Богородице, сугубым явлением на том же древе иконы сея вразумила еси его, да вси познают дар милосердия людем Тобою ниспосылаемый, и в веселии возопиют:

Радуйся, Кладезю неисчерпаемыя радости;

Радуйся, цвете благоуханный неизреченный сладости.

Радуйся, аки древом жизни, верныя духовно услаждающая; Радуйся, богатство невесомое всем чтущим ю подавающая. Радуйся, благодати Твоея и милости заблуждших не лишающая: Радуйся, покровом Твоим всех притекающих к иконе Твоей осеняющая.

Радуйся, гласу моления всех скорбящих послушная;

Радуйся, Мати милосердия, неоскудная.

Радуйся, Премилосердная Владычице, предстательство наше и всерадостное заступление.



Кондак 3


Силою вразумления о явлении чудотворныя иконы Твоея просвещенный, позна болярин Солтан, яко икона сия во утешение страждущим Тобою свыше ниспослана бысть, и, слезно моляся о неразумии своем, воздвиже храм на месте явления ея, да вси людие, молитвы в нем Богу вознося, воздают непрестанную о Тебе хвалу: Аллилуиа.



Икос 3


Имущи богатство милосердия неизреченное, не отринула еси промышлением избранных Твоих, в скорби велицей сущих. Егда бо храм, идеже бе иконы Твоя пречестная, огню предадеся, Ты, Всеблагая, Утешительнице, сохранши ю от огня неврежденною, паки явила на камени близ храма, огнем сожженнаго. Людие же, узреши таковое чудо, воспеша Ти хвалебную песнь сицевую: Радуйся, Купино неопалимая, неопально во огни пречестный Твой образ сохраншая;

Радуйся, скорбныя люди Твоя чудотворныя иконы не лишившая. Радуйся, кровом крылу Твоею христиан покрывающая;

Радуйся, предстательством Твоим святыни Твоя охраняющая. Радуйся, на камени пречестный Твой образ паки явившая;

Радуйся, вразумлением Твоим на камени веры стопы наша утвердившая.

Радуйся, яко стену нерушимую нашего прибежища Тебе стяжахом; Радуйся, яко благомощную Покровитсльницу Тя познахом. Радуйся, Премилосерд-ная Владычице, предстательство наше и всерадостное заступление.



Кондак 4


Бурею страстей и искушений одержимии вернии Твои, моляшеся пред чудотворною иконою Твоею, покой и душевную радость обретают. Ты бо, Дево чистая, христиан Путеводительница, правому пути их наставлявши и смысл бытия земнаго познати пособствуеши, да вси богокрасною песнию восхваляют Бога, поюще Ему: Аллилуиа.



Икос 4


Слышавшие людие, яко явленная Тобою икона даром чудес преизбыточествует, с верою и упованием на милосердие Твое к ней притекают и богатством щедрот Твоих обогатившеся, воспевают Ти хвалу таковую:

Радуйся, Мати милосердия, море щедрот христианом изливающая; Радуйся, радость всему миру приносящая.

Радуйся, священное прибежище верных;

Радуйся, Подательнице благ вечных.

Радуйся, Усладителънице горестей наших;

Радуйся, крепкое востание всех падших.

Радуйся, изнемогающих Заступнице и укрепление;

Радуйся, в страданиях наших присное утешение.

Радуйся, Премилосердная Владычице, предстательство наше и всерадостное заступление.



Кондак 5


Боготечней звезде, с востока возсиявшей, подобна была еси, Пресвятая Дево, егда в лучезарнем сиянии во образе жены красоты неизреченныя явилася еси детем, указуя место явления пречестныя иконы Твоея, чудесно Тобою от огня сохраненныя. Не лишила еси и малых сих Твоея благостыни, поучая их о великом милосердии Твоем, да, подражающе детем израилевым, восклицавшим Христу: Осанна, воспоют о Тебе хвалу Богу. Аллилуиа.



Икос 5


Видевши странное и преславное чудо иконою Твоею являемое, Пречистая, егда девица некая Ирина, в болезни сущая, подвигшися на поклонение святыне Твоей, на пути умре, и егда иноцы начата совершати чин погребения ея пред иконою Твоею, воскресе, вси людии со трепетом восклицаху:

Радуйся, Слово жизни плотию родившая;

Радуйся, молитвами Твоими мертвую рабу Твою воскресившая. Радуйся, ковчеже жизни нашея, от потопа смертнаго нас сохраняющая;

Радуйся, разуме пресветлый, сладости жизни вечныя познание нам дарующий.

Радуйся, иконою Твоею источники чудес великих нам являющая; Радуйся, тьму лютых обстояний от почитающих ю отгоняющая. Радуйся, знаменьми непостижимыми молящихся Ти ободряющая; Радуйся, матерними щедротами всех прибегающих к Тебе посещающая.

Радуйся, Премилосердная Владычице, предстательство наше и всерадостное заступление.



Кондак 6


Проповедницы благостыни Твоея явившася вси притекающии к цельбоносней иконе Твоей, Владычице. Не отринула бо еси никогоже из них, в теплей молитве руце свои к ней простирающих, да, познавши силу дара чудеснаго Тобою в ней являемого, возопиют Богу благодарственную песнь: Аллилуиа.



Икос 6


Возсиявшим лучем светозарным путь жития благонравственнаго озаряющим, явися всечестная обитель Жировицкая, под кровом святыни Твоея, Богомати, воздвигнутая. Сей бо дом подвигов иноческих, и училище божественнаго разумения юношам, освети землю Литовскую лучами истиннаго боговедения, да вси Тебе, ума Божественного Насадительницу, тако воспоют в песнях достохвальных:

Радуйся, Богородительнице света непостижимаго;

Радуйся, заре Солнца незаходимаго.

Радуйся, лествице, к небеси возводящая;

Радуйся, немудрых разумом Божественным умудряющая.

Радуйся, училище благочестия в стране нашей Насадительнице; Радуйся, в познании учений Христовых премудрая Руководительнице.

Радуйся, душ верных благодатно питающая;

Радуйся, верныя млеком премудрости насыщающая.

Радуйся, Премилосердная Владычице, предстательство наше и всерадостное заступление.



Кондак 7


Хотящи воздати поклонение иконе Твоей, многими чудесы просиявшей, посещаху обитель Жировицкую не токмо худороднии, но и царие земнии, припадающе к Пречистому Твоему образу, Владычице, и, чающе от Тебе великия и богатыя милости, приношаху Ти песнь хвалебную и Богови воспеваху: Аллилуиа.



Икос 7


Дивное воистину промышление явила еси. Владычице, верным Твоим, егда бо обитель Жировицкая лестно и насилием от православия отгорожена бысть, заступлением Твоим паки вдадеся людем православным. Сего ради вси правыя веры поклонницы, притекли к пречистому Образу Твоему с веселием воспеша: Радуйся, в скорбных обстояниях надежное наше прибежище; Радуйся, ищущим спасения тихое пристанище.

Радуйся, со апостолы веры Христовы Насадительнице;

Радуйся, глубины слова Божия премудрая Учительнице.

Радуйся, светильник Трисолнечнаго Света, истиною нас озаряющий;

Радуйся, столпе огненный, путь правыя веры нам показующий. Радуйся, от пагубных учений наше охранение;

Радуйся, душевредных учений посрамление.

Радуйся, Премилосердная Владычице, предстательство наше и всерадостное заступление.



Кондак 8


Странная и преславная чудеса познаша в Тебе, Богомати, вернии Твои, яко не токмо иконою Твоею благодатная дары им являеши, но и водам источника, на месте явления Твоея иконы проистекшаго, дар недуги исцеляти подаеши, да вси, великую и богатую милость, от Тебе восприимше, воспоют хвалебную песнь Богови: Аллилуиа.



Икос 8


Вси к покрову твоему прибегающии, не отходят от Тебе тощи и не услышаны; Ты бо, Богомати, скорби матерния при кресте Сына Твоего восприявшая, веси тяготу скорбей наших. Темже к Тебе, Мати, в скорби искушенней, яко общницы скорби и страданий Сына Твоего, тако взываем:

Радуйся, ненадеянных надеяние;

Радуйся, скорбных утешение.

Радуйся, печали наша утолящая;

Радуйся, всему миру радость дарующая.

Радуйся, в бедах сущим руку помощи скоро подавающая;

Радуйся, матернюю любовь и милосердие нам являющая.
Радуйся, Твоими молитвами пред Богом наша Заступница;

Радуйся, в напастех превеликая защитнице.

Радуйся, Премилосердная Владычице, предстательство наше и всерадостное заступление.



Кондак 9


Вся ангельская воинства Тебе, Богомати, яко высшую небес и чистую светлостей солнечных, величает: Бога бо зачала еси плотию и Света светов родила еси. Темже и мы, земнороднии, яко честнейшую Херувим и славнейшую без сравнения Серафим, величаюше Тя, воспоим о Тебе Богови: Аллилуиа.



Икос 9


Витийство всякое земнородных не довлеет к прославлению иконы Тобою явленныя, от нея же, яко от приснотекущего источника, притекающии обилие благ почерпают. Темже, недоумевающе восхвалити Тя по достоянию, яко первоисточницу благ сих, со умилением сердца взываем сице:

Радуйся, Домостроительнице нашего спасения, житие наше земное добре устрояющая;

Радуйся, Путеводительнице, к небесному отечеству нас возводящая.

Радуйся, благих виновная, благ вечных грешников не лишающая; Радуйся, Предстательнице наша пред Богом, праведный гнев Божий на милость претворяющая.

Радуйся, суетная мира сего презирати нас научающая;

Радуйся, прозрением ума нашего к любви Божественней нас привлекающая.

Радуйся, от всех бед скорое избавление;

Радуйся, отчаянных надежное спасение.

Радуйся, Премилосердная Владычице, предстательство наше и всерадостное заступление.



Кондак 10


Спастися хотящим нам, и под кров Твой прибегающим, буди, Пресвятая Дево, Помощница неоскудная. Сохрани нас от бед и напастей, наипаче же отчаяния и падения греховнаго, да приспевая в добродетелех Христовых, с радостию о предивнем Твоем заступлении благодарственно вопием: Аллилуиа.



Икос 10


Стеною крепкою Церкви Православней была еси, Пресвятая Дево, во дни тяжких испытаний ея; тем же молим Тя: заступи, покрой и соблюди ю и во дни наши лукавы от враг злокозненных, возстающих на ню, да вси радостно о Тебе возопием:

Радуйся, Церкве Христовы ограждение и православия поборнице; Радуйся, яко заступлением Твоим Церковь светло красуется. Радуйся, яко отступницы веры праотеческия Тобою вразумляются: Радуйся, яко Тобою козни врагов православия посрамляются. Радуйся, яко вразумлением Твоим истинная вера в стране нашей насаждается;

Радуйся, яко пышущая на ню злоба вражия утишается.

Радуйся, твердое православия укрепление;

Радуйся, еретичествующих посрамление.

Радуйся, Премилосердная Владычице, предстательство наше и всерадостное заступление.



Кондак 11


Пение всякое не довлеет восхвалити по достоянию щедроты Твоя, Пречистая, людем Тобою явленныя. Несть бо разума, могуща познати глубину милосердия Твоего, ни слова, во еже достойно воспети Тя. Обаче, благая сущи, приими и наша убогая хваления, да и мы, величие Твое прославляюще, воспоем о Тебе песнь Богу: Аллилуиа.



Икос 11


Светозарным лучем помощи благодатныя, пречистому образу Твоему присущая озари, Владычице, путь жития нашего прискорбный, да вси от бед, скорбей и лютых напастей, Тобою избавленнии, возможем право стояти в законе Господни, благодаряще Тя и поюще сице:

Радуйся, чудесы, иконою Твоею являемыя, яко омофором нас покрывающая;

Радуйся, бесчисленныя щедроты всем подавающая.

Радуйся, страсти наша и помыслы плотския утишающая;

Радуйся, всякия болезни наша телесныя и душевныя исцеляющая. Радуйся, Твоим ходатайством от всех бед избавляющая;

Радуйся, в скорбех и печалех скоро нас утешающая.

Радуйся, вдов заступление и сирых призрение;

Радуйся, юных исправление и старцев утешение.

Радуйся, Премилосердная Владычице, предстательство наше и всерадостное заступление.



Кондак 12


Благодать с небесе от Бога испроси нам, Владычице, к пречистому образу Твоему притекающим, и Тебе, Матерь Света, в песнях величающим, да, осеняеми покровом Твоим, во всяком благочестии и чистоте поживем и Престолу Царя Славы неосужденно предстати сподобимся, поюще о Тебе хвалебную песнь: Аллилуиа.



Икос 12


Поюще величия Твоя, Пресвятая Дево, восхваляем Тя вси, и, яко твердую Предстательницу спасения нашего, усердно молим: буди нам всем ко благу Помощница и услыши ны, умильно взывающия Ти: Радуйся, праваго пути ко Христу премудрая Указательнице; Радуйся, чистоты и целомудрия предивная Охранительнице. Радуйся, алчущих и жаждущих правды Питательнице;

Радуйся, ищущим предстательства Твоего неусыпная Заступнице. Радуйся, изнемогающим поможение;

Радуйся, всему миру защищение.

Радуйся, Путеводительнице наша, на всех путех жизни нас ограждающая;

Радуйся, и по смерти на воздушных мытарствах от духов злобы нас защищающая.

Радуйся, Премилосердная Владычице, предстательство наше и всерадостное заступление.



Кондак 13


О, Пресвятая Владычице, Дево Богородице, ангельскими чинми на небеси песнословимая, приими и от нас, недостойных раб Твоих, сие моление, в похвалу Ти приносимое, и от падений греховных нас избавляющи, наследниками Царствия Небеснаго соделай, да с Тобою во веки поем Богу: Аллилуиа, Аллилуиа, Аллилуиа.


(Этот кондак читается трижды, затем икос 1 и кондак 1)

 

 

МОЛИТВА

 

О Премилосердная Госпожѐ, Дево Богородице! Кѝима устна̀ма прикоснуся ко святыне Твоей, или кѝими словесы̀ исповѐм щедроты Твоя, лю̀дем являемыя? Никто̀же бо, притека̀яй к Тебе, отходит тошь и не услышан. От юности моея̀ взыскаях помощи и заступления Твоего, и николѝже лишен бых милосердия Твоего. Зрѝши, Госпожѐ, ско̀рби сердца моего и язвы души моея̀ вѐси. И ныне, коленопреклоненно предстоя пред пречѝстым Твоим о̀бразом, моления моя приношу Ти. Не лишѝ мя всесильнаго хода̀тайства Твоего в день ско̀рби моея̀, и в день печали моея̀ заступи мя. Тока слез моих не отвратися, Владычице, и радости мое сердце исполни. Прибежище и предстательство бу̀ди мне, милостивая, и света Твоего зарями ум мой просвети. И не тоякмо о себе молю Тя, но и о людех, притекающих к заступлению Твоему.

Церковь Сына Твоего соблюди и огради ю от злакозненных наветов враг, восстающих на ню. Архипастырем нашим послѝ помощь Твою и сохрани их здравых, долгоденствующих, право правящих слово истины Господни. Пастырем испроси у Бога, Сына Твоего, ревность и бдѐние о душа̀х врученнаго им стада словеснаго, и дух разума и благочестия, чистоты и правды Божественныя им низпослѝ. Испросѝ та̀кожде, Владычице, у Господа властем предержащим и градоправителем мудрость и силу, судия̀м – правду и нелицеприятие, всем же, притека̀ющим к Тебе, - дух цѐломудрия, смиренномудрия, терпение и любвѐ.

Еще же молю Тя, премилосердная, осени страну нашу кровом Твоея̀ благосты̀ни и избави ю от бедствий стихийных, нашествия иноплеменников и междоусобных нестроений, да вси, живущии в ней, в любви и мире пребывающе, тихое и безмятежное житиѐ проживут и, блага вечная молитвами Твоими унаслѐдивше, возмогут ку̀пно с Тобою восхваляти Бога на небесѝ во веки. Аминь.

 

 

 

ТРОПАРЬ

Тропарь, глас 5

Пред святою Твоею иконою, Владычице, молящиися исцелений сподобляются, веры истинныя познание приемлют и агарянская нашествия отражают. Темже и нам, к Тебе припадающим, грехов оставления испроси, помыслами благочестия сердца наша просвети и к Сыну Твоему молитву вознеси о спасении душ наших.

 

Величание

Величаем Тя, Пресвятая Дево, и почитаем честную икону Твою,  юже от лет древних во обители Жировицкой прославила еси.

 

КОНДАК

 

Тропарь, глас 2-й


Помощи от Тебе требующия не презри, Владычице, и милосердия бездну отверзи всем, притекающим к цельбоносней иконе Твоей. Печали наши житейския утоли, Всещедрая, и от юдоли сея плачевныя к радости вечней верныя Твоя престави: Тебе бо вси стяжахом надежду и утверждение, милости источник, покров и спасение душ наших.

Канон, глас 4

 

Песнь 1

 

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Припев: Пресвятая Богородице, спаси нас.

В Тя, одушевленный Чертоже, Бог вселися и, чрез Тебе прошед, явися Спас мира Господь, темже Тя, Богородице, воистинну величаем.
Пресвятая Богородице, спаси нас.

Ты еси, Мати Божия, миру Предстательница, молим Тя, Дево: простри руце Свои Богоноснии к Сыну Твоему Божественному, о нас умоляющи, да, помилует люди Своя погибающия.

Слава: Госпоже Пречистая, Мати Божия, Помощнице наша всесильная, Ты бо к Тебе прибегающим милость, чрез иконы цельбоносныя даруеши и ныне Тя молим, Пречистая: освяти нас иконою Твоею чудотворною, юже в обители Жировицкой прославила еси.

И ныне: Кто Тебе не ублажит, Пресвятая Дево? Ангельский собор и человеческий род по долгу Тя прославляет: Тебе бо ради Христос в мир явися, Егоже прославляюще, Тя величаем.

 

Песнь 3

 

Ирмос: Твоя песнословцы, Богородице, Живый и Независтный Источниче, лик себе совокупльшия, духовно утверди, в Божественней Твоей славе венцов славы сподоби.
Пресвятая Богородице, спаси нас.

Ты еси Одигитрия, Девице, Путеводительница наша, не остави люди, Тя возлюбившия, но присно руководи, чрез море житейское препровождающи в Царство Превечное Сына Твоего.

Пресвятая Богородице, спаси нас.

Мати роду человеческому изволила еси быти, Пречистая, темже мы, яко чада неутешная, к Тебе, Заступнице рода христианскаго, усердно прибегаем: не остави нас, сирых, Владычице, но скоро простри руку Свою бдагодеющую, изымающую ны от тины греховныя, утверждающи на пути покаяния.

Слава: Звездо пресветлая, Богородице, иконами чудотворными мир озарившая, просвети наш разум, грехми помраченный, и даруй нам славити Тя во веки.

И ныне: Днесь, вернии, любовию совокупившиися, Матерь Божию прославим, проповедующе чудеса Ея, от иконы Жировицкия явленныя, и Спасу вопием: приими молитвы рождшия Тя Богородицы и спаси души наша.

Господи, помилуй (трижды). Слава, и ныне:

Седален, глас 8-й

Днесь торжествует светло обитель Жировицкая, прославляющи Матерь Божию, место сие освятившую и образ Свои, яко дар многоценный, людем оставившую. Тем убо припадаем, вернии, к честней иконе Владычицы, дарует бо верным освящение и укрепляет сердца малодушная, в жизнь вечную приводящи.

 

Песнь 4

 

Ирмос: Седяй в Славе на Престоле Божества во облаце легце, прииде Иисус Пребожественный Нетленною Дланию и спасе зовущия: Слава, Христе, силе Твоей.

Пресвятая Богородице, спаси нас.

Ныне славит православных людей множество чудеса Твоя, Богородице, землю бо Русскую нам озарившая и свет Православия утвердившая.
Пресвятая Богородице, спаси нас.

Купино неопалимая, образ Свой во огни неврежденно сохраншая, попали скверну душ наших, к святей иконе Твоей с верою прибегающих.
Слава: Ты, Владычице, икону Свою паи даровала еси на камени велицем во обители Жировицкой, назнаменуя нам путь спасения на камени веры – Христе.

И ныне: Днесь Ангели и человецы песнь Господеви воспевают, славяще Пречистую Деву Богородицу.

 

Песнь 5

 

Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.
Пресвятая Богородице, спаси нас.

Приидите, вернии, ко кладезю милостей Божия Матере, всех нас покровом Своим покрывающей и о спасении нашем Христа умоляющей.
Пресвятая Богородице, спаси нас.

Кто исповесть чудеса Твоя, Богородительнице? Даруеши бо верным милости богатыя и исцеляеши недуги душевныя и телесныя.
Слава: Вси, притекающии с верою к цельбоносному образу Твоему, Дево, приемлют освящение и помощь в напастех, на ны находящих.
И ныне: Радуйся, обитель Жировицкая, сокровище великое зде хранящая, покров невидимый, свет немеркнущий – образ Чистыя Богородицы.

 

Песнь 6

 

Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.

Пресвятая Богородице, спаси нас.

Ликуйте, иноцы, днесь бо Небесная Игумения обители Жировицкия прославляется, днесь бо богатно милости изливаются от иконы Преславныя Богородицы.

Пресвятая Богородице, спаси нас.

Ты еси Наставница целомудрия, Ты еси училище благочестия, Ты еси любве неистощимый Источник, святый образ нам явившая.
Слава: Облагодати наш ум, низу преклоншийся, Дево Пречистая Богородице, Тя ныне радостно славящих.

И ныне: Воспойте, вернии, песнь Божественную, славяще Матерь Божию, Христа всему миру родившую.

Господи, помилуй (трижды). Слава, и ныне:

Кондак, глас 4-й

Величия Твоя кто исповесть, Пресвятая Дево, Творца всех Христа Бога рождшая? Едина бо еси Мати и Дева Преблагословенная и Препрославленная, упование наше, источник благостыни, верным прибежище и миру спасение.

Икос
От лет древних иконою чудотворною обитель Жировицкая славится, зде бо недугом исцеление, телесем здравие и душам спасение совершается. Темже припадающе, вернии, к святей иконе Владычицы, вопием: Дево Пречистая испроси у Христа Бога велию милость всем, с верою к Тебе притекающим, Ты бо верным прибежище и миру спасение.

 

Песнь 7

 

Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.
Пресвятая Богородице, спаси нас.

Осуши слезы скорбных, Радосте наша Богородице, к Тебе с верою приходящих, и даруй нам помощь великую.

Пресвятая Богородице, спаси нас.

Не остави, Пречистая, туне рабов Твоих, к честней иконе Твоей со страхом припадающих, и умоли о нас Всесильнаго Бога нашего, да дарует милость в День судный.

Слава: Образ Твой святый прославляюще, радуемся, Владычице, помоще наша и стено нерушимая всех, с верою к Тебе прибегающих.
И ныне: О Тебе радуемся и Тя прославляем, Дево Пречистая, яко Невместимаго вместила, еси, Егоже присно моли о спасении нашем.

 

Песнь 8

 

Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Пресвятая Богородице, спаси нас.

Киими песньми прославим Богородицу, дары нам великия подающую, чудодейственным бо образом Своим подвизает нас к пению: Господа пойте, дела, и превозносите во вся веки.
Пресвятая Богородице, спаси нас.

О, безчисленное чудес множество роду христианскому явившая и милости Своя неоскудно источающая, тем Тя поем во вся веки.
Слава: Якоже отроцы неопалимии в пещи явишася, тако девство в рождестве сохранила еси, Пречистая Дево Богородице, тем Тя поем во вся веки.

И ныне: Христа славословим, мира Спасителя, и Деву Пречистую славим, яко воистинну Богородицу.

 

Песнь 9

 

Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

Пресвятая Богородице, спаси нас.

Премилосердная Владычице, приими молитвы всех, Тя ныне славящих и образ Твой чествующих, даруй всем оставление прегрешений многих.

Пресвятая Богородице, спаси нас.

Приими нас, поющих Тебе, Дево, и к образу Твоему, яко к знамению милости Твоея, притекающих, и даруй рабом Твоим милости превеликия.

Слава: Облагоухай нас, многогрешных, Владычице, смраду греховному причастных, изми нас из пропасти погибельныя, утвердивши во благочестии.

И ныне: Спас мира и Господи, приими песнь радостную, дал бо еси людем Заступницу, Юже величающе, Тя присно славим.

Обновлено 29.11.2015 13:57
 






Рейтинг@Mail.ru Рейтинг@Mail.ru Rambler's Top100 Яндекс.Метрика